Վիրահայոց թեմի առաջնորդ Վազգեն եպիսկոպոս Միրզախանյանը հունիսի 2-ին օծել է Վրաստանի Մառնեուլիի շրջանի Կարմիր գյուղի Սրբոց Ավետարանչաց նորակառույց մատուռը: Մատուռը կառուցվել է Կարմիր գյուղի համայնքի անդամ Վիլիկ Խաչատուրյանի նախաձեռնությամբ եւ համայնքի անդամների ու առաջնորդարանի աջակցությամբ:
Հյուրեր էին ժամանել ինչպես Հայաստանից, այնպես էլ Թբիլիսիից եւ այլ շրջաններից: Արարողությանը ներկա էր Վրաստանի նախագահի խորհրդական, «Վրաստան» թերթի խմբագիր Վան Բայբուրթյանը:
Ինչպես News.am-ին հայտնեցին Վիրահայոց թեմից, արարողության ավարտին պատարագ է մատուցել Մառնեուլիի շրջանի հայության հոգեւոր հովիվ Մովսես քահանա Աշուրյանը:
Սրբոց Ավետարանչաց մատուռը Մառնեուլիի շրջանի հայկական ութ համայնքների միակ գործող սրբավայրն է: Թեմի առաջնորդարանը լիահույս է, որ նորանշանակ հոգեւոր հովվի գործունեության արդյունքում կվերաբացվեն եւ կհիմնվեն եկեղեցիներ եւ մատուռներ նաեւ մյուս գյուղերում:
