«Նուբարաշեն» քրեակատարողական հիմնարկի մոտ մարտի 4-ին տեղի ունեցած սպանության գործով ձերբակալվածներ կան:
NEWS.am-ի նախնական տեղեկություններով, «երրորդմասցի Լյովիկ» անունով հայտնի Լեւոն Ղազարյանի եւ նրա ընկերների սպանության գործով մինչեւ 3 հոգի է ձերբակալվել: Ըստ շրջանառվող տեղեկությունների, նրանք ԱԺ պատգամավոր Մհեր Սեդրակյանի՝ Թոխմախի Մհերի շրջապատից են:
Այս տեղեկությունը, սակայն, առայժմ հնարավոր չեղավ ճշտել ԱԱԾ-ից, որի վարույթում գտնվում է գործը:
Ավելի վաղ NEWS.am-ը հայտնել էր, որ մարտի 4-ին, ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ, սակայն ճանապարհին նրանք մահացել են։
Կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Նազարյանցը, մահացել է տեղում՝ ՔԿՀ-ի ավտոկայանատեղիում, որտեղ եղել է դեպքը։ Դեպքի առնչությամբ Քննչական կոմիտեում քրեական գործ է հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով: