Արագածոտնի մարզի Թաթուլ գյուղում այսօր՝ ապրիլի 7-ին, ցեղասպանությունը վերապրած 105-ամյա Գունյա Մարկոսյանին նախագահի օգնական Արմեն Աբելյանը եւ Արագածոտնի մարզպետ Սարգիս Սահակյանը նախագահի կողմից պարգեւատրել են «Հայոց ցեղասպանության 100-րդ տարելից» հուշադրամով եւ 1 մլն դրամով: Այս մասին NEWS.am-ի հետ զրույցում ասաց Արագածոտնի մարզպետի օգնական Կարեն Տոնոյանը:
Նրա խոսքով՝ Գունյա Մարկոսյանը Արագածոտնի մարզում միակ ցեղասպանությունը վերապրած կինն է, որը նման պարգեւի է արժանանում:
Կարեն Տոնոյանը նշեց, որ 105-ամյա կինը 5 տարեկան հասակում Կարսի Նախիջեւան գյուղից է գաղթել եւ բնակություն հաստատել Թաթուլ գյուղում: