Երեւանի Բեկնազարյան փողոցի թիվ 5/9 տան վերելակը գրանցված չի եղել եւ փորձաքննություն չի անցել: Այս մասին NEWS.am-ի թղթակցին փոխանցեց Տեխնիկական անվտանգության ազգային կենտրոնի տնօրենի տեղակալ, Երեւան քաղաքի ծառայության պետ Վոլոդյա Հովսեփյանը:
Նա նշեց, որ այս հասցեն սեփական տուն է, իսկ սեփական տների վերելակները ենթակա չեն գրանցման եւ փորձաքննության անցկացման: Վլադիմիր Հովսեփյանի փոխանցմամբ՝ չկա որեւէ մարմին, որը վերահսկի սեփական շենքում վերելակների տեղադրման հարցը:
Երեւանի քաղաքապետարանի տեղեկատվության եւ հասարակայնության հետ կապերի բաժնի պետ Արթուր Գեւորգյանն էլ NEWS.am-ի թղթակցի հետ զրույցում ասաց, որ դա մասնավոր առանձնատան վերելակ է եղել, ոչ թե բազմաբնակարան շենքի. «Սեփական տուն է, չորսհարկանի, որի ներսում գործում է վերելակ: Այդ վերելակը շահագործում է այդ ընտանիքը, դրա վերահսկման հետ կապված ոչ Երեւանի քաղաքապետարանը, ոչ էլ վարչական շրջանը կապ չունի»,-ասաց նա՝ ցավակցելով փոքրիկի ընտանիքի անդամներին եւ հարազատներին:
Ավելի վաղ NEWS.am-ը հայտնել էր, որ Հայաստանի ՏԿԱԻՆ-ում, այսօր՝ հունիսի 4-ին, ժամը 11.28-ին ահազանգ է ստացվել, որ երեխայի գլուխը մնացել է Երեւանի Բեկնազարյան փողոցի թիվ 5/9 տան վերելակի դռների արանքում: Դեպքի վայր մեկնած հրշեջ-փրկարարները 5-ամյա Լյուսի Բ.-ին դուրս են բերել վերելակից: Վերելակում են գտնվել նաեւ 7-ամյա Մ. Բ.-ն եւ երեխայի դայակ Ն. Զ.-ն: Լյուսի Բ.-ն հոսպիտալացվել է «Արմենիա» ՀԲԿ, որտեղ եւ մահացել է: