Սարի թաղի անկարգությունների գործով կալանավորված ու մեկ ամիս անց ազատ արձակված Գարիկ Առուստամյանն անարդար է համարում իր դեմ առաջադրված մեղադրանքը։
«Ոչ մի ապացույց չկար ինձ մեղադրանք առաջադրելու։ Ես որ մի բան չեմ արել, ոչ մեկին վնաս չեմ տվել, միայն խնդրել եմ, որ ճանապարհը բացեն, անցնեմ ես։ Եթե անգամ տրամաբանորեն նայենք, ես ոչ մի չեմ կարող բան արած լինեմ։ Իմ կարգավիճակը թույլ չի տալիս, ես գյուղատնտեսությամբ եմ զբաղվում, միտինգների ժամանակ չունեմ, չեմ էլ մասնակցում, քաղաքականությամբ էլ չեմ զբաղվում»,- NEWS.am-ի հետ զրույցում ասաց Գարիկ Առուստամյանը։
Գարիկը պատմեց, որ ինքը մեքենայով պարզապես փորձել է տուն վերադառնալ, երբ ոստիկանները իրենց մեքենայից հանել են ու ծեծել։
«Մեքենայից հանել են ու սկսել են ջարդել ոնց ասես։ Ասում էի, որ տուն եմ գնում, ավելի կոպիտ ու ագրեսիվ էին դառնում»,- ասաց Գարիկը։
Դրանից հետո Գարիկը երկու օր վերակենդանացման բաժանմունքում էր անցկացրել, ապա կալանավորվել։ Նրա խոսքով՝ ծեծի հետեւանքով առաջացած առողջական խնդիրներն անցել են։ Գարիկին ամենից շատ անհանգստացնում է կորցրած ժամանակը, քանի որ դրա հետեւանքով կիսատ են մնացել գյուղատնտեսական աշխատանքները։
Գարիկ Առուստամյանին մեղադրանք է առաջադրել Քրեական օրենսգրքի 225-րդ հոդվածի 2-րդ մասով, այն է՝ զանգվածային անկարգությունների ժամանակ դրանց մասնակցի կողմից բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը, որը պատժվում է ազատազրկմամբ` երեքից ութ տարի ժամկետով: