Նախագահ Սերժ Սարգսյանն Արցախում հանդիպել է զինծառայողների եւ նրանց այցելության գնացած ծնողների հետ ու խոսել սահմանների պաշտպանության մասին: Նախագահն ասել է, որ մեր բանակը շարունակում է խաղաղություն պարտադրել հակառակորդին, իսկ, հարկ եղած դեպքում, կարող ենք գործի դնել նաեւ «Իսկանդեր»-ները:

Հայաստանի եւ Արցախի անվտանգությունը որպես թիվ մեկ խնդիր նշելով՝ Սերժ Սարգսյանը հիշեցրել է, որ անցյալ տարվա ապրիլից ի վեր էլ ավելի է կատարելագործվել հայկական զինված ուժերի սպառազինությունը: Սերժ Սարգսյանն ասել է, որ հիմա իրեն շատ են հարցնում, թե ինչ է անելու նախագահության ժամկետի ավարտից՝ 2018 թվականից հետո: Դեռ չի որոշել, բայց մի բան հստակ գիտի. կլինի այնտեղ, որտեղ կարող է պիտանի լինել երկրի անվտանգությունն ապահովելու գործում:

Հավելենք նաեւ, որ նախագահը Հայրենիքի սահմանները պաշտպանելիս ցուցաբերած արիության եւ խիզախության համար պետական բարձր պարգեւով՝ Մարտական ծառայության մեդալով պարգեւատրել է մի շարք զինծառայողների, նվերներ հանձնել նրանց եւ ընտանիքում երկու կամ ավելի զինծառայող ունեցող ծնողներին:

ԵԱՀԿ Մինսկի խմբի համանախագահները Երեւան են ժամանել ու արդեն հանդիպել նախագահ Սերժ Սարգսյանի եւ արտգործնախարար Էդվարդ Նալբանդյանի հետ: Ներկայացրել են Բաքվում կայացած հանդիպումների արդյունքները, իսկ վաղը նաեւ Արցախ կմեկնեն:

Մինչ այդ, Մինսկի խմբի ամերիկացի համանախագահ Ռիչարդ Հոգլանդն այսօր զրուցել է լրագրողների հետ: Նշել է, որ երբեմն այս կամ այն առաջնորդը հայտարարում է ղարաբաղյան հակամարտության գոտում պատերազմի հնարավորության մասին, իսկ մյուս կողմն էլ պատասխանում է, բայց ոչ մի դեպքում չպետք է թույլ տալ, որպեսզի այդ հայտարարությունները պատերազմի վերածվեն:

Դիտարկմանը, որ եռանախագահների հայտարարությունները հասցեական չեն, Հոգլանդը պատասխանել է, որ իրենք տեղյակ են այն ամենի մասին, ինչ տեղի է ունենում շփման գծում։ Ապրիլյան պատերազմից հետո բանակցություններ, ըստ էության, չեն ընթանում, սակայն Ռիչարդ Հոգլանդը չի կարծում, որ դրանք փակուղի են մտել:

Հայաստանի եւ Ադրբեջանի արտգործնախարարները Մոսկվայում առանձին հանդիպումներ են ունեցել Մինսկի խմբի համանախագահների հետ, իսկ մոտ ապագայում էլ միասին կհանդիպեն ու կնախապատրաստեն արդեն նախագահների բանակցությունները:

Հայաստան «ԻԳԼԱ»-ի տեղափոխման գործը նոր զարգացումներ է ստանում: Գլխավոր դատախազությունը հաղորդագրություն է տարածել՝ տեղեկացնելով, որ հարցաքննության ընթացքում Սամվել Բաբայանը եւ մյուս կալանավորվածներն ընդունել են իրենց առնչությունը «ԻԳԼԱ»-ի արձակման խողովակի եւ «9М39» տեսակի հրթիռի ապօրինի շրջանառությանը, ինչպես նաեւ տեղեկություններ հայտնել դրա հանգամանքների վերաբերյալ:

Սամվել Բաբայանի փաստաբանը, սակայն, լրատվամիջոցներին տված հարցազրույցում ասել է, որ Բաբայանը չի ընդունում իր մեղքը, իսկ դատախազության տարածած հաղորդագրությունը, որ նա ընդունել է առնչությունը զենքի շրջանառությանը, Ավետիս Քալաշյանի խոսքով, իր պաշտպանյալի տված ցուցմունքի յուրովի մեկնաբանություն է, ինչպես մեղադրող կողմին է ձեռնտու: Ի դեպ՝ պաշտպանը պատրաստվում է նաեւ բողոքարկել Սամվել Բաբայանի կալանքի որոշումը։

«Օհանյան-Րաֆֆի-Օսկանյան» դաշինքի ներկայացուցիչները, որի հետ կապում են Սամվել Բաբայանի անունը, մշտական կապի մեջ է Քալաշյանի հետ եւ հակված է հավատալ նրան:

ՕՐՕ դաշինքի առաջնորդներից Րաֆֆի Հովհաննիսյանին էլ լրագրողները հարցրել են քաղաքականությունից եւ ընդհանապես երկրից հեռանալու շուրջ մամուլի հրապարակումների մասին. հերքել է:

Իսկ նախընտրական քարոզչության շրջանակում ընտրողների հետ հերթական հանդիպմանը Կարեն Կարապետյանը դժվարացել է խոսել. ձայնը կտրվել էր, բայց հավաստում է, որ պատճառը քարոզարշավը չէ: Գյումրիում էլ Կարապետյանի փոխարեն անեկդոտ պատմելու գործը ստանձնել եւ ուրախ տրամադրությունն ապահովել են արդարադատության եւ մշակույթի նախարարները:

Մինսկում այսօր կայացել են մարտի 25-ին եւ 26-ին Կամքի օրվա կապակցությամբ չարտոնված ակցիաների ժամանակ ձերբակալվածների զանգվածային դատավարությունները: Դրանք ավանդաբար տեղի են ունենում հետեւյալ սցենարով. ձերբակալվածներն իրավախախտման համար «մեկօրյա» պատիժ են ստանում՝ զանգվածային միջոցառման ժամանակ կարգուկանոնը խախտելու, պաշտոնատար անձի պահանջով օրենքին չհնազանդվելու կամ մանր խուլիգանության համար: Իսկ իրավապաշտպանները հայտնել են շաբաթ երեկոյան կայացած ակցիայի ժամանակ ավելի քան 700 ձերբակալվածի մասին:

Իսկ Ռուսաստանի մի շարք քաղաքներում մարտի 26-ին կոռուպցիայի դեմ պայքարի պահանջով ակցիաներ են անցկացվել: Դրանց նախորդել են Կոռուպցիայի դեմ պայքարի հիմնադրամի հետաքննական հրապարակումները, որոնցում ներկայացվել է Ռուսաստանի վարչապետ Դմիտրի Մեդվեդեւի ունեցվածքի չափը: Հիմնադրամը, ի դեպ, ֆինանսավորում է ընդդիմադիր գործիչ Ալեքսեյ Նավալնին: Հենց նա էլ կողմնակիցներին կոչ էր արել փողոց դուրս գալ: Իրավապահների տվյալներով ակցիային 7-8 հազար մարդ է մասնակցել: Այստեղ նույնպես ձերբակալվածներ կան՝ ավելի քան 1000 մարդ, որոնց մի մասին, սակայն, գիշերն ազատ են արձակել: Ձերբակալվել է նաեւ Ալեքսեյ Նավալնին. նրան 15-օրյա ժամկետով կալանավորել են եւ 20 հազար ռուբլի տուգանք սահմանել: Նավալնիին մեղավոր են ճանաչել Մոսկվայում չարտոնված զանգվածային ակցիա կազմակերպելու համար:

82 տարեկանում մահացել է Հայաստանի Ժողովրդական արտիստ Լորենց Առուշանյանը: Նա ծնունդով Բաքվից էր: Աշխատել է Գյումրիի Աճեմյանի անվան դրամատիկական, Երեւանի Ստանիսլավսկու անվան ռուսական, իսկ հետո՝ երկար տարիներ Սունդուկյանի անվան ազգային ակադեմիական թատրոնում: 1984 թվականին արժանացել է Հայաստանի վաստակավոր, 2003-ին` ժողովրդական արտիստի կոչման, իսկ 2006 թվականին՝ «Տարվա լավագույն տղամարդու դերի համար» մրցանակի:

2018 թվականի աշխարհի առաջնության ընտրական փուլի Հայաստան-Ղազախստան հանդիպումն ավարտվեց 2:0 հաշվով: Երեւանի «Հանրապետական» մարզադաշտում կայացած հանդիպման հաշիվը 73-րդ րոպեին բացեց Հայաստանի ազգային հավաքականի ավագ Հենրիխ Մխիթարյանը, իսկ 75-րդ րոպեին հաշիվը կրկնապատկեց փոխարինման դուրս եկած Արաս Օզբիլիսը: Հանդիպումը հաջող չէր կիսապաշտպան Գեւորգ Ղազարյանի համար. խաղի հենց երրորդ րոպեին 28-ամյա ֆուտբոլիստը լուրջ վնասվածք ստացավ: Նրա մոտ ծնկահոդի խաչաձեւ կապանների մասնակի կտրվածք եւ մենիսկի վնասվածք է ախտորոշվել: Ղազարյանը տեղափոխվել է հիվանդանոց, իսկ վերջնական ախտորոշումը կարվի արդեն Գերմանիայում:

Նշենք, Աշխարհի առաջնության ընտրական փուլում սա Հայաստանի ազգային հավաքականի արդեն երկրորդ հաղթանակն է: Արթուր Պետրոսյանի գլխավորած թիմն այսպիսով վաստակեց 6 միավոր եւ հավասարվեց երրորդ տեղում գտնվող դանիացիներին: Ընտրական մրցաշարում Հայաստանի հավաքականը հաջորդ խաղը կանցկացնի հունիսի 10-ին՝ հյուրընկալվելով Չեռնոգորիայի թիմին, որին Երեւանում հաղթել է 3:2 հաշվով:

Մարտի 27-ին եվրոն թանկացել է միանգամից 3 դրամով, իսկ դոլարը փոքր-ինչ զիջել է դիրքերը: Արդյունքում դոլարի փոխարժեքն այսօր կազմել է 484 դրամ, եվրոյինը՝ 526, ռուբլունը՝ 8 դրամ 52 լումա, ֆունտինը՝ 609 դրամ:

Մարտի 28-ին հանրապետության շրջանների մեծ մասում ժամանակ առ ժամանակ տեղումներ են սպասվում: Օդի ջերմաստիճանն էապես չի փոխվի: Երեւանում նույնպես վաղը ժամանակ առ ժամանակ անձրեւ է սպասվում: Մայրաքաղաքում գիշերը կդիտվի +4+6, ցերեկը՝ +13+15 աստիճան տաքություն: