Երեւանի ավագանու ընտրություններից հաշված օրեր առաջ սկանդալ է հասունացել: «Ելք» դաշինքի ներկայացուցիչները վաղ առավոտից բարձրաձայնում են ՀՀԿ-ի նախընտրական շտաբերում ընտրակաշառք բաժանելու դեպքերի մասին:

Ամեն ինչ սկսվել է դեռ կեսգիշերն անց: «Հայկական ժամանակ»-ի թղթակից Աննա Զախարյանը հայտնել է, որ աշխատանքից տուն գալիս Կուրղինյան փողոցում Տարոն Մարգարյանի շտաբից դուրս եկող մարդկանց է նկատել, ձեռքերին, լրագրողի հավաստմամբ, արդեն քվեարկած քվեաթերթիկներ եւ գումար։ Ինչ-որ տղաներ մոտեցել են լրագրողին, խլել հեռախոսը, իսկ որոշ ժամանակ անց վերադարձրել՝ ամեն ինչ ջնջած: Դեպքից հետո «Ելք»-ի անդամները սկսել են շրջել Տարոն Մարգարյանի նախընտրական շտաբերում: Նույն Կուրղինյան փողոցում Մարգարյանի շտաբի մոտ Նիկոլ Փաշինյանի, «Ելք»-ի անդամների եւ ոստիկանների միջեւ քաշքշուկ է տեղի ունեցել: Իրավապահները Փաշինյանին թույլ չեն տվել շտաբ մտնել՝ պատճառաբանելով, որ ներսում զննություն է կատարվում:

Նիկոլ Փաշինյանը նաեւ տեսանյութ է տարածել Արաբկիրից՝ հայտարարելով, որ «ՍԱՍ»-ի աշխատակիցները փող են բերել շտաբ: Դրանից հետո շտաբի դռները փակվել են, ներսում հսկողություն է սահմանվել եւ ոչ ոքի թույլ չեն տվել տարածք մտնել: Կարճ ժամանակ անց Փաշինյանին ու նրան ուղեկցողներին, այնուամենայնիվ, ներս են թողել: Այստեղ արդեն կրքերը փոքր-ինչ թեժացել են:

«Ելք» դաշինքի ձեռքի տակ նաեւ հրահանգներով եւ մարդկանց անուններով ցուցակներ են հայտնվել, որոնք պետք է ձայներ բերեն Տարոն Մարգարյանի համար: Նրանց թվում նաեւ ոստիկանության ՊՊԾ գնդի աշխատակիցների անուններ կան: Փաշինյանն իր ֆեյսբուքյան էջում տեսանյութ է հրապարակել ու ներկայացրել իրենց մոտ հայտնված նյութերը: Ոստիկանապետ Վլադիմիր Գասպարյանի հանձնարարականով ծառայողական քննություն է սկսվել՝ Փաշինյանի հայտարարած ցուցակների վերաբերյալ:

Ավելի ուշ ՀՀԿ նախընտրական շտաբը հայտարարություն է տարածել՝ նշելով, որ քաղաքապետի թեկնածու Նիկոլ Փաշինյանի տարածած նյութերը որեւէ առնչություն չունեն Հանրապետականի նախընտրական գործունեության հետ:

Հանրապետականի նախընտրական ամփոփիչ հավաքի ժամանակ լրագրողները Տարոն Մարգարյանից հետաքրքրվել են, թե որքանով է տեղյակ այսօրվա իրադարձություններից: 

Իսկ «Ելք» դաշինքը Կենտրոնական ընտրական հանձնաժողով դիմում է ներկայացրել՝ պահանջելով ուժը կորցրած ճանաչել Երեւանի ավագանու ընտրություններին մասնակցող Հանրապետական կուսակցության գրանցումը: ԿԸՀ-ն նիստ է հրավիրել ժամը 20-ին, ինչից վրդովված «Ելք»-ի ներկայացուցիչները որոշել են դիմել նաեւ Վարչական դատարան՝ կապված Հանձնաժողովի անգործության հետ:

Կրկին սկանդալի կենտրոնում է հայտնվել Գյումրու նախկին քաղաքապետ, նորընտիր պատգամավոր Վարդան Ղուկասյանի որդին: Ըստ մամուլի հրապարակումների՝ Սպարտակ Ղուկասյանը գնացել է իր ընտանիքին պատկանող, բայց վարձով տրված գազալցակայան ու ծեծել աշխատակիցներին: Լուրերի համաձայն՝ ծեծված մի երիտասարդ աչքի լուրջ վնասվածք է ստացել եւ կուրանալու վտանգ կա: Նա «Գազպրոմ Արմենիայի» Շիրակի մասնաճյուղի փոխտնօրեն Աղասի Ջանոյանի քրոջ որդին է: Ոստիկանությունն ահազանգ է ստացել, տեղեկությունները ստուգվում են: Մեր թղթակցի հետ զրույցում, սակայն, Վարդան Ղուկասյանը չի ցանկացել մեկնաբանել որդու հետ կապված միջադեպի մասին լուրը՝ այն հորինված եւ դիտավորություն որակելով. հիմարություններ են, որոնց պատգամավորը չի հավատում:

Հանրապետությունում գրանցված արտակարգ պատահարների մասին: Իջեւան-Երեւան ճանապարհին մահվան ելքով խոշոր վթար է տեղի ունեցել. «ԶԻԼ»-ը բախվել է «Ֆորդ»-ին, այնուհետեւ դուրս եկել հանդիպակաց գոտի ու բախվել «ՎԱԶ-2107» մակնիշի ավտոմեքենայի: Պատահարի հետեւանքով «ՎԱԶ-2107»-ի ուղեւորուհին՝ 56-ամյա Աիդա Ջառահյանը, տեղում մահացել է, իսկ մյուս 2 ուղեւորները՝ 24-ամյա Սերգեյ Բադալյանը եւ 85-ամյա Էմմա Դավթյանը, մահացել են հիվանդանոցում: Հոսպիպտալացվել է նաեւ «ՎԱԶ-2107»-ի վարորդը՝ 53-ամյա Միշա Բադալյանը: «ԶԻԼ»-ի վարորդը՝ Հրազդանի 64-ամյա բնակիչ Նորիկ Մարգարյանը, դեպքի վայրից փախուստի է դիմել, իսկ հետո ինքնակամ ոստիկանություն ներկայացել:

Երեւանի Շենգավիթ վարչական շրջանում բակերից մեկում կնոջ դի են հայտնաբերել: Մահացածը 77-ամյա կին է, նետվել է շենքի 6-րդ հարկից: Իրավապահները երկտող են գտել, որում կինը խնդրել է իր «քայլի համար ոչ ոքի չմեղադրել»: Ըստ տեղեկությունների՝ մահացածը նախկինում նույնպես մի քանի անգամ ինքնասպանության փորձ է կատարել, բայց հարազատները կանխել են:

Մայիսի 12-ին դոլարը, եվրոն եւ ռուբլին էժանացել են: Արդյունքում դոլարի փոխարժեքն այսօր կազմել է 484 դրամ, եվրոյինը՝ 526, ռուբլունը՝ 8 դրամ 46 լումա, ֆունտինը՝ 622 դրամ:

Մայիսի 12-ին հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +10+12, ցերեկը՝ +25+27 աստիճան տաքություն: