Ժիրայր Սեֆիլյանի եւ մյուսների գործով այսօրվա դատական նիստը նույնպես, ձեւավորված ավանդույթի համաձայն, ուշացումով է սկսվել: Փաստաբաններ Տիգրան Հայրապետյանն ու Արայիկ Պապիկյանը դարձյալ թույլ չեն տվել զննել իրենց, նրանց էլ արգելել են դատարան մտնել:
Ներսես Պողոսյանի պաշտպանին, ի դեպ, արդեն երկրորդ անգամ էին արգելում դատարան մտնել: Արայիկ Պապիկյանի հավաստմամբ՝ պատճառն այն է, որ թույլ չի տալիս խուզարկել իր դրամապանակը: Այդ մասին տեղեկացրել է նաեւ նախագահող դատավորին, բայց, միեւնույն է, նիստն առանց իրեն են սկսել:
Իսկ նիստերի դահլիճում «պատժվելու» հերթը Ժիրայր Սեֆիլյանինն ու Ներսես Պողոսյանինն էր: Երբ դատավոր Տաթեւիկ Գրիգորյանը դահլիճ է մտել, ամբաստանյալները ոտքի չեն կանգնել: Գրիգորյանը դա դատարանի նկատմամբ անհարգալից վերաբերմունք է համարել ու սանկցիա կիրառել: Սեֆիլյանին ու Պողոսյանին ուժով հեռացրել են նիստերի դահլիճից: Ամբաստանյալներին նիստերի դահլիճ վերադարձնելու մասին փաստաբան Տիգրան Եգորյանի միջնորդությունը դատավորը մերժել է, արդյունքում պաշտպանները նույնպես հեռացել են: Սեֆիլյանի եւ մյուսների գործով հաջորդ դատական նիստը նշանակվել է հունիսի 30-ին:
Զանգվածային անկարգությունների մեջ մեղադրվող Արարատ Խանդոյանն այսօր 3.5 տարի ժամկետով ազատազրկման դատապարտվեց: Դատավճիռը նա ժպիտով եւ ծափերով ընդունեց ու այն անհիմն որակեց: Մինչ այդ՝ Արարատ Խանդոյանին վերջին խոսքի հնարավորություն տրվեց: Այն հակիրճ էր:
Խանդոյանի շահերի պաշտպան Արա Ղարագյոզյանը պատրաստվում է բողոքարկել դատավճիռը, կդիմի նաեւ Մարդու իրավունքների եվրոպական դատարան: Հիշեցնենք, որ «Սասնա ծռեր» խմբի անդամ Արայիկ Խանդոյանի եղբորը մեղադրում են անցյալ տարվա ամռանը ոստիկանության Երեւանի ՊՊԾ գնդի գրավման օրերին տեղի ունեցած զանգվածային անկարգություններին մասնակցելու, ոստիկանների հարվածելու համար:
Նախագահ Սերժ Սարգսյանն այսօր Ազգային անվտանգության խորհրդի նիստ էր հրավիրել: Քննարկված հարցերի թվում մեծ ուշադրություն է հատկացվել Մերձավոր Արեւելքի իրադարձություններին եւ հայ համայնքների վրա դրանց ազդեցությանը: Նախագահը հանձնարարել է հնարավոր բոլոր քայլերը ձեռնարկել՝ Մերձավոր Արեւելքում մեր հայրենակիցների անվտանգությունն ապահովելու եւ սիրիահայ փախստականների կարիքները հոգալու համար:
Այսօր Ազգային ժողով եկած պետեկամուտների կոմիտեի ղեկավարը լրագրողների ուշադրության կենտրոնում էր: Վարդան Հարությունյանին հարցրել են ստվերի, օլիգարխների արտոնությունների, նաեւ իր կուտակած հարստության մասին: Ասել է, որ վաղուց է բիզնեսով զբաղվում եւ նորմալ է, որ կարողություն ունի:
Հիմա արդեն պաշտոնյա է եւ իր բիզնեսով ընտանիքի անդամներն են զբաղվում: Նրանց, սակայն, չի հովանավորում, ինքը նույնպես հովանավորներ չի ունեցել: Պնդմանը, թե հարկայինի ստուգումները շինծու են, ինչի արդյունքում իշխանություն ունեցողներն այդպես էլ չեն հրաժարվում բիզնեսից ու շարունակում են հարստանալ, Հարությունյանն արձագանքեց, թե ուրիշի փողերը չի հաշվում: Ինչ վերաբերում է ներկրումների ոլորտի իրավիճակին. ՊԵԿ նախագահը վստահեցնում է, որ Հայաստանում մենաշնորհ կամ սահմանափակում չկա, յուրաքանչյուրը կարող է ներկրել՝ ինչ ցանկանա:
Մոսկվայում գնդակահարել են հայ գործարար Վաչիկ Աբգարյանին: Հիվանդանոց տեղափոխված Աբգարյանի մոտ բժիշկները կլինիկական մահ են արձանագրել: Դեպքի վայրում՝ գործարարի մարմնի մոտ, ատրճանակ են հայտնաբերել:
57-ամյա Աբգարյանը ղեկավարում էր Մոսկվայի «Կապշին» շինարարական ընկերությունը, որը քաղաքային վարչակազմի խոշոր կապալառուներից է: Իրավապահները չեն բացառում, որ ձեռնարկատիրոջ վրա հարձակման պատճառները կարող են պայմանավորված լինել բիզնեսի հետ կապված տարաձայնություններով:
Գյումրիում երեկ հնչած կրակոցների գործով մեկ անձ է հայտնաբերվել: Բերման է ենթարկվել Գյումրիի 31-ամյա բնակիչ, «Չախալ» մականունով հայտնի Կարեն Սարգսյանը: Մամուլի տեղեկություններով՝ հրաձգության հետեւանքով տուժած 35-ամյա Գեորգի Հակոբյանն Ախուրյանի նախկին դատախազ, հանգուցյալ Հակոբ Հակոբյանի որդին է: Նա ընկերների հետ սրճարանում է եղել, դուրս գալիս վիճաբանություն է սկսվել եւ կրակոցներ են հնչել: Հիվանդանոց տեղափոխված Հակոբյանի վիճակը դեռ ծանր է:
Որոշ աղբյուրների համաձայն՝ նա խնդիրներ է ունեցել քրեական հեղինակություն, «Զապ» մականունով հայտնի Անդրանիկ Սողոյանի հետ, իսկ կրակոցներ արձակելու մեջ կասկածում են Սողոյանի շրջապատից Ռուդիկ անունով մի երիտասարդի: Ամեն դեպքում, ոստիկանությանը հայտնի են բոլոր կասկածյալները, նրանց որոնում են: Իրավապահները, սակայն, կասկածյալների ինքնության մասին դեռ չեն հայտնում:
Դոլարն ու եվրոն շարունակել են թանկանալ, փոքր-ինչ աճել են նաեւ ռուբլին եւ ֆունտը: Դոլարի փոխարժեքն այսօր կազմել է 480 դրամ, եվրոյինը՝ 540, ռուբլունը՝ 8 դրամ 15 լումա, ֆունտինը՝ 612 դրամ:
Հունիսի 28-ին հանրապետության հյուսիսային շրջաններում սպասվում է կարճատեւ անձրեւ եւ ամպրոպ: Օդի ջերմաստիճանն էապես չի փոխվի, իսկ հունիսի 30-ին 2-3 աստիճանով կնվազի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +20+22, ցերեկը՝ +37+38 աստիճան տաքություն: