4 օր անց վերջապես հաջողվել է մարել «Խոսրովի անտառում» մոլեգնող հրդեհի հիմնական օջախները: Հայաստան ժամանած ռուսական «ԻԼ-76» ինքնաթիռի միայն 9-րդ թռիչքից հետո է հնարավոր դարձել մարել կրակը: Աշխատանքներին «օգնել» է նաեւ գիշերվանից տեղացող անձրեւը:
Չնայած վտանգավոր օջախները մարվել են, գլխավոր հարցը դեռ անպատասխան է մնում՝ որն է եղել խոշոր հրդեհի պատճառը: Բնապահպան Կարինե Դանիելյանն այսօր լրագրողներին հայտնել է, որ ամենայն հավանականությամբ, մարդկային գործոնն է պատճառը: Գլխավոր դատախազությունը չի շտապում մեկնաբանություն տալ: Մյուս կարեւոր հարցն է՝ ինչու Խոսրովի անտառի հրդեհը մարելու համար ավելի շուտ հայկական կողմը չդիմեց Ռուսաստանին՝ ինքնաթիռ տրամադրելու խնդրանքով: Հնչող մեղադրանքների եւ քննադատությունների հետ Արտակարգ իրավիճակների նախարար Դավիթ Տոնոյանը համաձայն չէ: NEWS.am-ին տված հարցազրույցում նախարարը վստահեցրել է՝ օգնության են դիմել ժամանակին: Թե ինչ վնասներ է կրել անտառը հրդեհից, առայժմ չի հաղորդվում: Բնապահպանները մոտավոր հաշվել են՝ ոչնչացվել է արգելոցի տարածքի 10 տոկոսը:
Խորհրդարանական ընտրություններից առաջ հանրապետությունում տեղի ունեցած միջադեպերը հանգուցալուծում են ստացել: Նախընտրական քարոզարշավի մեկնարկից առաջ Արարատի մարզում տեղի ունեցած դանակահարության մեջ մեղադրվող Արթուր Հայրապետյանը դատապարտվել է 5 ամսվա ազատազրկման: Ի դեպ, դանակահարությունից անմիջապես հետո «Ծառուկյան» դաշինքի ներկայացուցիչ Նաիրա Զոհրաբյանը հայտարարեց, որ ՀՀԿ-ական Մուրադ Մուրադյանի թիմակիցն է դանակահարել ԲՀԿ-ի համախոհին: Երկրորդ միջադեպը գրանցվեց մարտի 14-ին Արմավիրի մարզի Ջրառատ գյուղում: ՕՐՕ-ի եւ ՀՀԿ-ի համախոհների միջեւ տեղի ունեցած դանակահարության գործով ամբաստանյալ Տիգրան Սարգսյանն օրերս դատապարտվել է 1 տարվա պայմանական ազատազրկման: Նշենք, որ այդ դանակահարությանը նախորդել էր ծեծկռտուք, որին մասնակցել էին նաեւ Հայաստանի ոստիկանապետի տեղակալ Լյովա Երանոսյանն ու նրա եղբայրը, որը նույնիսկ մարմնական վնասվածքներով դեպքից հետո ոստիկանություն էր դիմել:
Հետաքրքիր է, որ երկու դեպքերն էլ իրավապահները որակեցին որպես կենցաղային հողի վրա հանցագործություն:
ԵՄ-ի Հարավային Կովկասում եւ Վրաստանում ճգնաժամի գծով հատուկ ներկայացուցիչ Հերբերթ Զալբերը լքում է իր պաշտոնը։ Նա աշխատանքի է անցնելու Գերմանիայում: Ո՞վ է լինելու նոր հատուկ ներկայացուցիչը, NEWS.am-ի թղթակցին ԵՄ-ի մամուլի քարտուղարի գրասենյակից հայտնել են, որ նոր հանձնակատար նշանակելու գործընթացը շարունակվում է եւ արդյունքների մասին կհայտարարեն առաջիկայում:
Հայաստանից Ռուսաստան ավիատոմսերն օգոստոսին կտրուկ թանկացել են: Եթե հուլիսին Երեւան-Մոսկվա տոմսը կարելի էր գնել մինչեւ 68 հազար դրամով, այս օրերին դժվար է գտնել նույնիսկ 160 հազար դրամանոց տոմսեր: Ավիաընկերությունները NEWS.am-ի թղթակցի հետ զրույցում սակագների նման բարձրացումը պայմանավորել են սեզոնային պահանջարկով. սեպտեմբերի 1-ից գները կրկին կիջնեն, վստահեցրել են ընկերության ներկայացուցիչները: Քաղավիացիայի գլխավոր վարչությունը նույնպես համակարծիք է. դիտավորություն չկա, ընդամենն առաջարկը պահանջարկին չի բավարարում, իսկ պետությունն այս գործում ոչինչ անել չի կարող. ավիաընկերությունն ինքն է որոշում իր գնային քաղաքականությունը:
Հայաստանի քաղաքացին այսօր գիշերը մահացել է «Դոմոդեդովո» օդանավակայանում: 57-ամյա տղամարդը դստեր հետ պետք է Երեւան թռչեր, սակայն հանկարծակի իրեն վատ է զգացել: Բուժկետ տեղափոխելուց րոպեներ անց տղամարդը մահացել է: Հայտնի է, որ մինչեւ օգոստոսի 14-ն ուղեւորն ուռուցքային հիվանդության դեմ բուժում է ստացել Մոսկվայում:
Արմավիրի մարզի Արշալույս գյուղում այսօր զինվորական կարգով հուղարկավորել են Արցախում զոհված ժամկետային զինծառայողին: 19-ամյա Արման Մովսիսյանը 1 տարվա զինծառայող էր, դեպքը տեղի է ունեցել դիրքերում, Արմանը զոհվել է հակառակորդի կրակոցից: Նրան հրաժեշտ տալու էին եկել բարձրաստիճան զինվորականներ, ծառայակից ընկերները:
62 տարեկանում մահացել է Ռուսաստանի ժողովրդական արտիստուհի Վերա Գլագոլեւան: Դերասանուհու մահվան պատճառը եղել է օնկոլոգիական հիվանդությունը: Վերա Գլագոլեւան դերասանուհի էր, ռեժիսոր, խաղացել է «Թշնամիներ», «Մի կրակեք սպիտակ կարապների վրա», «Քո մասին» եւ այլ ֆիլմերում: Վերջին անգամ նա խաղացել էր Իվան Տուրգենեւի պիեսի հիման վրա 2014 թ.-ին նկարահանված «Երկու կանայք» ֆիլմում:
Եվրոյի փոխարժեքը շարունակում է նվազել: Օգոստոսի 16-ին եվրոյի փոխարժեքը կազմել է 560, դոլարինը՝ 478, բրիտանական ֆունտինը՝ 616 դրամ: Աճել է միայն ռուբլու փոխարժեքը՝ կազմելով 8.03 դրամ:
Հանրապետությունում այսօր գիշեր եւ վաղը երեկոյան ժամերին շրջանների մեծ մասում սպասվում է անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվի, իսկ 18-ին կբարձրանա 3-4 աստիճանով: Մայրաքաղաքում նույնպես սպասվում է անձրեւ եւ ամպրոպ:
