Հայաստանը չի կարող ազատ առաջ ընթանալ, եթե Լեռնային Ղարաբաղի խնդիրը լուծված չէ: Այս մասին սեպտեմբերի 19-ին ԱԺ-ում լրագրողների հետ զրույցում ասաց ԱՄՆ Կոնգրեսի Ներկայացուցիչների պալատի անդամ Աննա Էշուն:
Ի պատասխան NEWS.am-ի՝ Լեռնային Ղարաբաղի անկախության միջազգային, մասնավորապես ԱՄՆ-ի ճանաչման հեռանկարների վերաբերյալ հարցին՝ հաշվի առնելով, որ ամերիկյան մի շարք նահանգներ Լեռնային Ղարաբաղը ճանաչող բանաձեւեր են ընդունել, կոնգերսականը նշեց. «Ես կասեի, որ ԱՄՆ-ում այս առիթով փոքրամասնության ձայներ կան: Դրանք ժողովրդավարության մեջ տարբեր ձայներ են: Մշտապես բոլորը բոլորի հետ համաձայն չեն: Եվ ես գիտեմ, որ դուք էլ այս մասին հրաշալի գիտեք: Կարծում եմ, որ այստեղ գլխավոր հարցն այն է, թե ինչպիսին է եղել Լեռնային Ղարաբաղի նկատմամբ Միացյալ Նահանգների քաղաքականությունը: Մենք ընդգծել ենք, որ դա ԵԱՀԿ Մինսկի խմբի առաքելությունն է, որը պետք է առաջ ընթանա: Մենք հավատում ենք, որ սա շատ կարեւոր է հիմնահարցի խաղաղ կարգավորմանը հասնելու համար: Սա հայերի յուրաքանչյուր սերնդի շահերի շրջանակում է»:
