Հրաժարագնի չափը, որը Մեծ Բրիտանիան համաձայն է Բրյուսելին վճարել Brexit-ի հետ կապված Եվրամիության նկատմամբ պարտավորությունների չկատարման համար, կարող է կազմել 20 մլրդ եվրոյից ոչ պակաս: Financial Times պարբերականը չորեքշաբթի հայտնել է, որ այս գումարի մասին Մեծ Բրիտանիայի վարչապետ Թերեզա Մեյը կհայտարարի Ֆլորենցիայում Brexit-ի թեմայով ծրագրային ելույթում:
Պարբերականի տեղեկություններով՝ Եվրամիությունից Միացյալ Թագավորության դուրս գալու հարցերով Մեյի առաջատար խորհրդական Օլիվեր Ռոբինսը ԵՄ երկրների մի քանի առաջնորդների աշխատակազմերի աշխատակիցներին իրազեկել է, որ հինգշաբթի Ֆլորենցիայում նախատեսված Մեծ Բրիտանիայի վարչապետի Brexit-ի թեմայով ծրագրային ելույթում անդրադարձ կլինի հրաժարագնի թեմային: Գերմանիայի կանցլեր Անգելա Մերկելն իր հերթին բրիտանական կառավարությունից տեղեկություն է ստացել, որ գումարը, որի մասին Մեյը կբարձրաձայնի Տոսկանայի վարչական կենտրոնում, կկազմի առնվազն 20 մլրդ եվրո:
Միեւնուն ժամանակ, ԵՄ իշխանություններն արդեն ակնարկել են, որ Մեծ Բրիտանիայի չկատարած պարտավորությունները հասնում են մինչեւ 100 մլրդ եվրոյի, սակայն դուրս գրելով փոխադարձ պարտքերը՝ այն կարող է 60 մլրդ եվրո կազմել: Չնայած Լոնդոնի առաջարկած 20 մլրդ եվրոն Բրյուսելի ակնկալիքներից էապես քիչ է, բրիտանական իշխանություններն առաջին անգամ հասկացնում են, թե Եվրամիությանը Brexit-ի համար վճարվող ինչպիսի գումարն են իրենց համար ընդունելի համարում:
Հոդվածում շեշտվում է, որ «Մեյի թիմը հույս ունի, որ այս առաջարկը Brexit- հարցով Բրյուսելի հետ բանակցությունները փակուղուց կհանի, որը ճանապարհ կբացի Մեծ Բրիտանիայի եւ Եվրամիության իջեւ ապագա առեւտրային հարաբերությունների հարցի քննարկման համար»: