Մահացել է հայտնի գործարար եւ բարերար Լեւոն Հայրապետյանը: Նա 68 տարեկան էր: Կյանքի վերջին տարիները Հայրապետյանը դատական հետապնդումների մեջ անցկացրեց. նա 4 տարվա ազատազրկման էր դատապարտվել՝ նախկին սենատոր Իգոր Իզմեստյեւի մորից 700 հազար դոլար կորզելու մեղադրանքով: Հայրապետյանը, սակայն, չէր ընդունում իրեն առաջադրված մեղադրանքը: Առողջական խնդիրների պատճառով գործարարը տնային կալանքի տակ էր, սակայն 2016 թվականին տեղափոխվել էր Մորդովիայի բանտ՝ ամենասարսափելի կալանավայրերից մեկը Ռուսաստանում: Գործարարի դուստրը՝ Անժելիկա Հայրապետյանը նշել է, որ հայրը ցանկություն էր հայտնել հուղարկավորվել ծնողների կողքին՝ Մոսկվայի հայկական գերեզմանատանը:
Ուկրաինայի Ուժգորոդ քաղաքում սպանվել է 54-ամյա հայ գործարար Անդրանիկ Նիկողոսյանը: «Ապարան» ընկերության տնօրենին սպանել է նրա երկարամյա բիզնես գործընկեր եւ ընկեր Վարդան Թովմասյանը: Վերջինը փախուստի չի դիմել, նրան ձերբակալել են հանցագործության վայրում: Ոստիկանության տվյալներով՝ մինչեւ կրակոցները հնչելը հարձակվողի եւ զոհի մեջ վեճ է եղել: Անդրանիկ Նիկողոսյանը ծնունդով Ապարանից էր, բռնցքամարտի ԽՍՀՄ սպորտի վարպետ, եղել է ԽՍՀՄ հավաքականի կազմում:
Նշենք, որ սա մեկ շաբաթվա ընթացքում ուկրաինահայ երկրորդ գործարարի սպանությունն է: Հոկտեմբերի 5-ին էլ Մոսկվայում սպանվել էր Օդեսայից գործարար Արսեն Փափազյանը: Նոր մանրամասներ են հայտնի նաեւ Մոսկվայում 38-ամյա հայի սպանությունից: Ռուսական աղբյուրների համաձայն՝ հանցագործի թիրախում եղել է ոչ թե սպանվածը, այլ մարզիկ Լեչա Սերբիեւը: 38-ամյա Գեորգին նրա վարորդն է եղել: Ըստ լուրերի՝ 33-ամյա Սերբիեւը հիմա բիզնեսով է զբաղվում եւ խոշոր պարտքեր ունի:
Ազգային ժողովի պետաիրավական հարցերի մշտական հանձնաժողովը հետաձգել է Էթիկայի ժամանակավոր հանձնաժողով ստեղծելու մասին «Ելք» խմբակցության առաջարկի քննարկումը։ Նախատեսվում էր այդ հանձնաժողովում քննել Նիկոլ Փաշինյանի եւ ՀՀԿ-ական պատգամավոր Արտաշես Գեղամյանի միջեւ տեղի ունեցած միջադեպը: «Ծառուկյան» դաշինքի պատգամավոր Գեւորգ Պետրոսյանն իրեղեն ապացույցներ է պահանջել Նիկոլ Փաշինյանից այն մասին, որ իր նկատմամբ բռնություն է կատարվել։
Փաշինյանը Պետրոսյանին խորհուրդ է տվել ապացույցների մասին հարցնել իր կուսակից Նապոլեոն Ազիզյանից, որը միջադեպի ականատեսն է եղել: Սակայն Ազիզյանն օրակարգի այս հարցի քննարկման ժամանակ արդեն դահլիճում չի եղել: Ինչ վերաբերում է ապացույցներին. Նիկոլ Փաշինյանն ասել է՝ հենց դրա համար էլ առաջարկում են հանձնաժողով ստեղծել: Գեւորգ Պետրոսյանը նաեւ խորհուրդ է տվել մոռանալ տեղի ունեցածը. դեռ մի քանի տարի միասին աշխատելու են: Իսկ Փաշինյանը, կարծես, ոչինչ մոռանալ չի պատրաստվում: Փոխարենը ուզում է հասկանալ, թե ինչ պայմաններում են աշխատելու:
Այսօր տնտեսական զարգացման եւ ներդրումների նախարարության մեկամյա գործունեությունն է ամփոփել Սուրեն Կարայանը: Նախարարը խոսել է ներդրումների, ձեռներեցներին աջակցության, ՏՏ ոլորտում իրականացվող ծրագրերի մասին: Մասնավորապես, ՏՏ ոլորտին պետական աջակցության շնորհիվ մեկ տարվա ընթացքում շուրջ 150 սթարթափ է ստեղծվել, մինչդեռ 2014 թվականին դրանց թիվն ընդամենը 16-ն է եղել: Ինչ վերաբերում է ներդրումներին. մի քանի միլիոն դոլարի ներդրում է արվել Հայաստանի տնտեսությունում, այդ թվում օտարերկրյա ներդրումներն ավելացել են 26.3%-ով:
Սուրեն Կարայանը տպավորիչ է անվանել ՀՆԱ-ի ցուցանիշում արտահանման ծավալները: Ապրանքների եւ ծառայությունների արտահանման ծավալների աճն առաջին 8 ամիսներին կազմել է 21.7%: Ընդ որում, ծառայությունների մասով աճ են արձանագրել այն ոլորտները, որոնք կապված են զբոսաշրջության հետ: Նախարարը հույս ունի առաջիկա տարիներին այս ցուցանիշները հասցնել 40-45%: Շուկաները թիրախավորել են, աշխատել են, որպեսզի այդ շուկաներ հայկական ապրանքների մուտքը դյուրացվի, խոչընդոտները վերացվեն: Արդյունքներ, Կարայանի հավաստմամբ, արդեն կան:
ՄԱԿ-ի արդյունաբերական զարգացման կազմակերպության հետ աշխատանքի շնորհիվ էլ միայն այս տարվա ամիսների 14-20 մլն դոլարի պատվեր է եղել: Սուրեն Կարայանն ընդգծել է նաեւ հարեւան Իրանի հետ աշխատանքի արդյունավետությունը, ինչի արդյունքում այս երկիր արտահանման աննախադեպ աճ ենք ունեցել. այս տարվա ութ ամիսներին՝ 11.2 տոկոս:
Կարագի գներն այս տարվա 9 ամիսների ընթացքում շուրջ 35 տոկոսով բարձրացել են: Տնտեսական մրցակցության պաշտպանության հանձնաժողովի նախագահն այսօր ներկայացրել է գնագոյացման վրա ազդող մի շարք գործոններ: Արտակ Շաբոյանը չի բացառում, որ գների աճի վրա կարող էին ազդել նաեւ տնտեսվարողների հակամրցակցային գործողությունները: Եվս մեկ գործոն էլ միջազգային շուկայում կարագի գների աճն է:
Պարբերաբար խոսվում է նաեւ ներկրման ոլորտում գերիշխող դիրքի եւ մենաշնորհների մասին, մասնավորապես՝ շաքարավազի, բանանի, կարագի մասով: Արտակ Շաբոյանն այսօր վստահեցրել է, որ այս մթերքները ներմուծողների թիվն էականորեն աճել է: Այս երեք շուկաներում գերիշխող դիրք ունեցող ընկերություններ, այո, կան, բայց նախկին իրավիճակի հետ համեմատ՝ այստեղ, հանձնաժողովի նախագահի հավաստմամբ, նոր խաղացողներ են հայտնվել:
Դոլարը շարունակում է թանկանալ, իսկ եվրոն եւ ֆունտն էժանացել են: Հոկտեմբերի 18-ին դոլարի փոխարժեքը կազմել է 481 դրամ, եվրոյինը՝ 565, ռուբլունը՝ 8 դրամ 39 լումա, ֆունտինը՝ 633 դրամ:
Հոկտեմբերի 19-23-ը հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա: Երեւանում նույնպես տեղումներ չեն սպասվում: Մայրաքաղաքում գիշերը կդիտվի +4+6, ցերեկը՝ +19+21 աստիճան տաքություն: