Տարածաշրջան ԱՄՆ նախագահ Դոնալդ Թրամփի այցի նախաշեմին ամերիկյան ռմբակոծիչները ճապոնական եւ հարավկորեական ռազմական օդանավերի հետ զորավարժությունների շրջանակում թռիչք են իրականացրել Կորեական թերակղզու երկնքում, փոխանցում է AFP-ն:
B-1B Lancer երկու ռմբակոծիչներ ՌՕՈւ Գուամում գտնվող Անդերսենի բազայից օդ են բարձրացել եւ միացել ճապոնական կործանիչներին, ավելի ուշ նրանց են միացել նաեւ հարավկորեական օդանավերը: ԱՄՆ ՌՕՈւ հայտարարության մեջ նշվել է, որ զորավարժությունները Խաղաղ օվկիանոսում մշտական ներկայության առաքելության մասն են եւ նվիրված չէին ինչ-որ իրադարձության:
Հյուսիսային Կորեայում այս զորավարժություններն արդեն դատապարտել են: Կորեայի կենտրոնական հեռագրական գործակալության հաղորդագրության մեջ նշվում է, որ «իմպերիալիստ գանգստերները» փորձում են միջուկային պատերազմ հրահրել:
Վերջին ամիսներին ԱՄՆ նախագահ Դոնալդ Թրամփը եւ Հյուսիսային Կորեայի նախագահ Կիմ Չեն Ընը սպառնալիքներ եւ անձնական վիրավորանքներ են փոխանակել. ԱՄՆ նխագահն ի պատասխան Փհենյանի սպառնալիքների զգուշացրել է «կրակի եւ ցասման» մասին, իսկ Կիմը Չեն Ընը Թրամփին «խելքից զրկված ծերուկ» է անվանել:
Թրամփը Ասիայի երկրներով շրջագայությունը կսկսի նոյեմբերի 3-ին: Այն կտեւի 12 օր: Շրջագայության շրջանակում ԱՄՆ նախագահը կայցելի Հարավային Կորեա, Ճապոնիա, Ֆիլիպիններ, Չինաստան, Վիետնամ: Քննարկման հիմնական թեման է լինելու Հյուսիսային Կորեայի միջուկային եւ հրթիռային ծրագիրը: