Սերժ Սարգսյանն այսօր Մինսկում մասնակցել է ՀԱՊԿ հավաքական անվտանգության խորհրդի նիստին: Ինչպես եւ սպասվում էր, Խորհուրդն Արցախի խնդրի վերաբերյալ հայտարարություն է ընդունել: Դրանով ՀԱՊԿ անդամ երկրների նախագահները եւս մեկ անգամ վերահաստատել են իրենց աջակցությունը ԵԱՀԿ Մինսկի խմբի համանախագահողների գործունեությանը, ինչպես նաեւ հիմնահարցի կարգավորման երեք` ազգերի ինքնորոշման իրավունքի, ուժի եւ ուժի սպառնալիքի չկիրառման եւ տարածքային ամբողջականության սկզբունքներին:
Կառավարության այսօրվա նիստի առանցքային թեման բնական գազի հաջորդ տարվա սակագինն է եղել: Էներգետիկ ենթակառուցվածքների եւ բնական պաշարների նախարար Աշոտ Մանուկյանը հիշեցրել է շուրջ 1 ամիս առաջ Հայաստանի եւ Ռուսաստանի վարչապետերի հանդիպման ժամանակ ձեռք բերված համաձայնությունը:
Հաջորդ կարեւոր հարցը վերաբերում էր Դատական նոր օրենսգրքին: Արդարադատության նախարարը մանրամասնել է, որ նոր նախագծով առաջարկվում է Երեւանում ունենալ ընդհանուր իրավասության առաջին ատյանի մեկ դատարան, 2019 թվականից էլ Հայաստանում կստեղծվի Սնանկության դատարան: Դավիթ Հարությունյանի խոսքով՝ նոր օրենսգրքով սահմանվելու է նաեւ դատական սանկցիաների՝ ավելի հստակ համակարգ:
Կարեն Կարապետյանն էլ հանձնարարականներ ուներ նախարարությունների եւ մարզպետարանների համար: Մասնավորապես, վարչապետը հանձնարարել է Ամանորին նախորդող եւ տոնական օրերին հերթապահություն սահմանել մաքսակետերում եւ առեւտրային բանկերում:
Վրաստանի վարչապետի պաշտոնական այցը Հայաստան հետաձգվել է: Հայկական կողմը նշում է, որ Գիորգի Կվիրիկաշվիլիի այցը հետաձգվել է անորոշ ժամանակով: Այն կկայանա Վրաստանի խորհրդարանի կողմից երկրի կառավարության կազմը հաստատելուց հետո: Հիշեցնենք, որ Վրաստանի վարչապետը Հայաստան պետք է գար դեկտեմբերի 1-ին:
Ազգային ժողովն այսօր քննարկել է «Ընտանեկան բռնության մասին» նոր օրինագիծը: Պետաիրավական եւ մարդու իրավունքների պաշտպանության հարցերի մշտական հանձնաժողովում քննարկումն անցել է ուրախ մթնոլորտում, լավ տրամադրությունն ապահովել է «Ծառուկյան» խմբակցության պատգամավոր Գեւորգ Պետրոսյանը:
Շուրջ 30 րոպե քննարկումից հետո հարցը քվեարկության է դրվել. հանձնաժողովի անդամներից նախագծին դեմ է քվեարկել միայն Գեւորգ Պետրոսյանը: Աղմկահարույց այս օրինագիծը քննարկման կդրվի խորհրդարանի առաջիկա քառօրյայում:
Երեւանի քաղաքապետարանի առեւտրի եւ սպասարկման վարչության պետ Արման Եդոյանին կասկածում են կաշառք պահանջելու մեջ։ Գլխավոր դատախազի խորհրդական Գոռ Աբրահամյանը մեզ հետ զրույցում հայտնեց, որ մի քաղաքացի հաղորդում է ներկայացել, որ Եդոյանն իրենից կաշառք է պահանջել: Հաղորդումն ուղարկվել է ոստիկանություն՝ քրեական գործ հարուցելու հիմքերը ստուգելու: Հիշեցնենք, որ քաղաքապետարանի պաշտոնյան առաջին անգամ չէ, որ հայտնվում է սկանդալի կենտրոնում: 2015թ. Երեւանի բնակչին մահացու վրաերթի ենթարկելու դեպքը նույնպես կապում են Արման Եդոյանի հետ:
Ռուսական մեդիայում Հայաստան-ԵՄ համաձայնագրի ստորագրումը զանգվածային հիստերիա է առաջացրել:
Փաստերի անխնա խեղաթյուրում, պրոֆեսիոնալիզմի բացակայություն, ագրեսիվ հռետորաբանություն՝ ուղղված «ռազմավարական գործընկերոջը» հնարավորինս կոշտ խոցելուն եւ ստորացնելուն. սրանով են աչքի ընկնում ռուսական լրատվամիջոցները՝ «եղբայրական» Հայաստանի դեմ հիստերիկ արշավ սկսելով:
Ռուսական լրատվամիջոցների այսպիսի դիրքորոշումն, անկասկած, չի կարող հարուցել Հայաստանի բնակիչների հիացմունքը: Սա, բնականաբար, հրաշալի հասկանում են ինչպես ռուսաստանցի լրագրողներն ու փորձագետները, այնպես էլ իշխանությունները: Հարցն այն է, թե ինչո՞ւ է սա արվում, ի՞նչ նպատակով է երկու երկրների հասարակություններում արհեստականորեն եւ կանխամտածված հակակրանք սերմանվում: Ռուսաստանի պետդումայի արտաքին հարաբերությունների հանձնաժողովի անդամ Սերգեյ Ժելեզնյակը նախօրեին հայտարարել է, թե Ռուսաստանում հակահայկական տրամադրություն չկա, իսկ Հայաստանի Ազգային ժողովի փոխնախագահ Էդուարդ Շարմազանովը ռուսական եթերում հնչող հակահայկական քարոզչությունը «տգետ մեկնաբանություններ» է որակել:
Ռուսաստանի վարչապետ Դմիտրի Մեդվեդեւն իրեն նախագահի պաշտոնում չի տեսնում: Ռուսական լրատվամիջոցներին տված հարցազրույցում նա ասել է, որ զբաղվում է սիրելի գործով եւ իրեն երջանիկ է համարում: Առաջիկա նախագահական ընտրություններին, Մեդվեդեւի խոսքով, «Եդինայա Ռոսիան» պատրաստ է սատարել Վլադիմիր Պուտինին, եթե նա որոշի մասնակցել ընտրություններին:
Պնդումների համաձայն՝ այն կարող է խոցել թիրախներն ԱՄՆ ամբողջ տարածքում եւ հզոր մարտագլխիկ կրել: Հիշեցնենք, որ նոյեմբերի 28-ին Հյուսիսային Կորեայի արձակած բալիստիկ հրթիռը շուրջ 50 րոպե տեւողությամբ թռիչքից հետո ընկել էր Ճապոնիայի բացառիկ տնտեսական գոտում: Նշենք նաեւ, որ ԱՄՆ նախագահ Դոնալդ Թրամփը հարկային բարեփոխմանը նվիրված ելույթում անսպասելիորեն հիշատակել է Հյուսիսային Կորեայի առաջնորդ Կիմ Չեն Ընին՝ նրան «հիվանդ շնիկ» անվանելով:
Դեկտեմբերի 1-ից հանրապետության տարածքում սպասվում է առանց տեղումների եղանակ: Օդի ջերմաստիճանը դեկտեմբերի 1-ի գիշերը կնվազի 5-7 աստիճանով: Մայրաքաղաքում գիշերը կդիտվի -2-4 աստիճան ցուրտ, ցերեկը՝ +7+9 աստիճան տաքություն:
