ՌԴ ԱԳՆ պաշտոնական ներկայացուցիչ Մարիա Զախարովան Facebook-ի իր էջում հայտնել է, որ Կիեւում Վրաստանի նախկին նախագահ, Օդեսայի նախկին նահանգապետ Միխայիլ Սաակաշվիլիի ձերբակալության միջադեպն իրեն Կառլսոնին է հիշեցրել:
«Փոքրիկ, իսկ ո՞վ է նա,- հարցրեց Կառլսոնն իր ընկերոջը՝ զննելով հարեւան տանիքին պարկանման ստվերը: - Դժվար է ասել՝ կամ Վրաստանի նախագահն է, կամ Օդեսայի նահանգապետը,- հորանջելով պատասխանեց Փոքրիկը: - Իսկ նա ի՞նչ է անում տանիքին,- էլ ավելի մտահոգված հարցրեց Կառլսոնը: - Նա չէ՞ որ պրոպելլեր չունի: - Պրոպելլեր չունի, փոխարենը վառելանյութն ընտիր է,- երազելով ասաց Փոքրիկը»,- իր էջում գրել է Զախարովան:
Երեքշաբթի առավոտյան Սաակաշվիլիի բնակարանում խուզարկություն է կատարվել, ինքը՝ Սաակաշվիլին բարձրացել է 8-հարկանի շենքի տանիք եւ սպառնացել է ցած նետվել: Ավելի ուշ նա ձերբակալվել է եւ շենքից դուրս բերվել իրավապահների ուղեկցությամբ, նրան ավտոմեքենա են նստեցրել, սակայն քաղաքական գործչի կողմնակիցներն անկարգություն են հրահրել, մեքենան շրջապատել են եւ ծակել անիվները: Իրավապահներին մինչեւ հիմա չի հաջողվում Սաակաշվիլիին տանել: Ուկրաինայի գլխավոր դատախազ Յուրի Լուցենկոն հայտարարել է, որ Կիեւում Սաակաշվիլիի կազմակերպած ակցիաները ֆինանսավորել է Ուկրաինայի նախկին նախագահ Վիկտոր Յանուկովիչի շրջապատը, մասնավորապես՝ բիզնեսմեն Սերգեյ Կուրչենկոն, որոնք ուղղված էին Ուկրաինայում պետական իշխանության տապալմանը:
