ՀՀԿ-ի նախագահի թեկնածուն շարունակում է հանդիպումների շարքը: Արմեն Սարգսյանն այսօր էլ հանդիպման էր գնացել Գիտությունների ազգային ակադեմիա: Գիտնականների հետ նա քննարկել է կրթության, գիտության, արտագաղթի խնդիրը, երկրի զարգացման հարցը:
Մինչ այդ լրագրողները Սարգսյանին հարցրել են, թե որքան ժամանակով է մտադիր վերադառնալ: Մեծ Բրիտանիայում Հայաստանի դեսպանը նախ ասել է՝ ընդմիշտ, հետո վերաձեւակերպել պատասխանը: Արմեն Սարգսյանի անունը կապում են նաեւ աղմուկ հանած Ամուլսարի հետ: Թեկնածուն, սակայն, վստահեցնում է. բացարձակ կապ չունի: Հիշեցնենք, որ Սերժ Սարգսյանի հետ հանդիպման ժամանակ Արմեն Սարգսյանը ժամանակ էր խնդրել՝ նախագահի թեկնածու առաջադրվելու հարցում վերջնական որոշում կայացնելու համար: Մինչ այդ նա մտադիր է մի շարք հանդիպումներ ունենալ: Երեկ արդեն հանդիպել է խորհրդարանական ուժերից ՀՀԿ-ի եւ ՀՅԴ-ի հետ, «Ելք» եւ «Ծառուկյան» խմբակցությունների հետ էլ կհանդիպի հաջորդ շաբաթ:
Հայաստանի նոր վարչապետն ու նախագահը հարեւաններ կլինեն. նրանց ծառայողական առանձնատուն կտրամադրեն Երեւանում եւ պետական ամառանոց՝ Սեւանում: Կառավարման խորհրդարանական համակարգի անցմանն ընդառաջ՝ արդարադատության նախարարությունը շրջանառության մեջ է դրել «Պետական պաշտոններ զբաղեցրած անձանց սոցիալական երաշխիքների մասին» օրենքում փոփոխությունների նախագիծը: Դրա համաձայն՝ նոր վարչապետի նստավայրը կլինի Բաղրամյան 26-ում, նախագահինը՝ Մաշտոցի 47 հասցեում: Վարչապետի աշխատակազմը չի կարող գերազանցել 600-ը, իսկ նախագահի աշխատակազմն ավելի համեստ կլինի՝ 180 աշխատակցով: Նախատեսվում է նաեւ վարչապետին տրամադրել հատուկ նշանակության ավտոտրանսպորտ, ինքնաթիռ եւ ուղղաթիռ, մինչդեռ նախագահը միայն ավտոտրանսպորտ կունենա:
Նիկոլ Փաշինյանի արկածները Հռոմում: Ազգային ժողովի պատգամավորն այսօր Fecebook-ում գրել է, որ Իտալիայի ոստիկանությունը պաշարել է հյուրանոցի իր սենյակը: Փաշինյանը հեգնել է. Հայաստանի իշխանությունները Ինտերպոլի միջոցով դեռ փնտրում են իրեն: Ոստիկանությունն արձագանքել է գրառմանը՝ տեղեկացնելով, որ 2009 թվականից, երբ Նիկոլ Փաշինյանը ներկայացել է իրավապահներին, նրա նկատմամբ միջազգային հետախուզումը դադարեցվել է, այդ մասին տեղեկացվել է նաեւ Ինտերպոլի գլխավոր քարտուղարությունը: Հիշեցնենք, որ Փաշինյանը հետախուզման մեջ էր 2008 թվականի հետընտրական իրադարձություններից հետո: 2010 թվականին նա 7 տարի ժամկետով ազատազրկման էր դատապարտվել, 2011-ին՝ համաներմամբ ազատ արձակվել:
Հայկական ատոմակայանը պետք է հնարավորինս շուտ փակվի. Եվրամիությունն է պահանջում: Երեւանում այսօր մեկնարկած Հայաստան-ԵՄ ենթակոմիտեի նիստի ժամանակ Դիրկ Լորենցը վստահեցրել է, որ ատոմակայանի անվտանգությունը բարելավել հնարավոր չէ: Էներգետիկայի փոխնախարարը սրանում ոչ մի արտառոց բան չի տեսնում: Հայկ Հարությունյանի խոսքով՝ դժվար է պատկերացնել, որ ատոմակայանի գործող էներգաբլոկը կարելի է ընդմիշտ շահագործել: Ըստ նրա՝ Հայաստան-ԵՄ բանակցությունների արդյունքում հստակ ձեւակերպվել է, որ մեր երկիրը պետք է ատոմակայանի գործող բլոկի ապագործարկման ճանապարհային քարտեզ ներկայացնի: Անվտանգության ստանդարտներ են մշակվել, 300 մլն դոլարի ներդրում է արվել, բայց ՀԱԷԿ-ի շահագործման ժամկետը կարող է երկարաձգվել 10 տարով: Հետո արդեն հերթը կհասնի այլընտրանքային էներգետիկայի զարգացմանը:
Նախկին պատգամավորի՝ «Յուվեցի Կարո» մականունով հայտնի Կարո Կարապետյանի փեսայի մահվան պատճառը հայտնի է. դիահերձման արդյունքների համաձայն՝ պատճառն ինսուլտն է: Հիշեցնենք, որ 33-ամյա Գոռ Առաքելյանին մահացած էին հայտնաբերել հունվարի 25-ին, պատգամավոր Սամվել Ալեքսանյանին պատկանող «Նաբերեժնի» հյուրանոցային համալիրում: Դիակի վրա բռնության հետքեր չեն եղել: Որոշ տեղեկություններով՝ հյուրանոցի սենյակում, որտեղ գտել են Առաքելյանի մարմինը, սեղանին թմրանյութ հիշեցնող սպիտակ փոշի են հայտնաբերել: Գոռ Առաքելյանը հայտնի էր 2014 թվականին Վերնիսաժի մոտ հնչած կրակոցների գործով: Նա մեղավոր էր ճանաչվել եւ դատապարտվել 6.5 տարվա ազատազրկման, սակայն ամիսներ առաջ համաներմամբ ազատ էր արձակվել:
ԱՄՆ-ն հրապարակել է ռուս պաշտոնյաների եւ օլիգարխների ցուցակը, որոնց դեմ կարող են անհատական պատժամիջոցներ կիրառվել: «Կրեմլյան զեկույց»-ում ներառվել է 114 բարձրաստիճան պաշտոնյա եւ 96 օլիգարխ: Ցանկում ներառված է Ռուսաստանի գրեթե ամբողջ ղեկավարությունը. ամենաբարձրաստիճան պաշտոնյան վարչապետ Դմիտրի Մեդվեդեւն է, զեկույցում նաեւ 22 նախարարի անուն կա: Օլիգարխների ցանկում 3 հայ կա՝ Սամվել Կարապետյանը, Դանիիլ Խաչատուրովը եւ Սերգեյ Գալիցկին: Փորձագետները կարծում են, որ ամերիկյան զեկույցում հայտնվելը կսահմանափակի արտասահմանում այդ պաշտոնյաների եւ գործարարների բիզնես գործունեությունը: Հատկանշական է, որ «Կրեմլյան զեկույց»-ում Վլադիմիր Պուտինի անունը չկա: Պատասխանելով այդ մասին հարցին՝ Ռուսաստանի նախագահը հեգնել է. «Վիրավորական է»:
Թբիլիսիի մետրոյում արտակարգ դեպք է տեղի ունեցել. մետրոյի «Վարկեթիլի» կայարանում առաստաղը փլուզվել է: Պատահարի հետեւանքով 14 մարդ է տուժել, այդ թվում՝ անչափահասներ: Ականատեսները պատմել են, որ այն փլվել է, երբ մարդիկ սպասում էին գնացքի ժամանմանը:
Տուժածների թվում հայեր չկան, թեեւ Վրաստանի մայրաքաղաքի այս շրջանում մեծ թվով հայեր են բնակվում: Թբիլիսիի քաղաքապետ Կախա Կալաձեն նշել է, որ տուժածների բուժման ծախսերը կհոգա քաղաքապետարանը: Ի դեպ՝ մետրոյի «Վարկեթիլի» կայարանն անցյալ տարի էր վերանորոգվել:
Հունվարի 30-ին դոլարի փոխարժեքը կայուն է եղել, եվրոն շարունակել է էժանանալ: Դոլարի փոխարժեքն արդյունքում կազմել է 480 դրամ, եվրոյինը՝ 596, ռուբլունը՝ 8 դրամ 58 լումա, ֆունտինը՝ 676 դրամ:
Հունվարի 31-ին հանրապետությունում սպասվում է առանց տեղումների եղանակ: Օդի ջերմաստիճանը հունվարի 31-ից փետրվարի 4-ը 6-8 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի -3-5 աստիճան ցուրտ, ցերեկը՝ +5+6 աստիճան տաքություն: