Ճապոնիայի Ֆուկուոկա քաղաքի փողոցում, որտեղ փլվածք էր առաջացել, ընդամենը մեկ շաբաթում մի ամբողջ փողոց վերակառուցեցին: Լոս Անջելեսում ընդամենը 30 ժամում 16 կիլոմետր երկարությամբ ավտոճանապարհ կառուցեցին: Գերմանիայում մի քանի օրվա ընթացքում առանձնատուն են կառուցում:
Երեւանում գրեթե ցանկացած շինարարություն, բացառությամբ էլիտար շենքերի, տարիներ է տեւում, իսկ վերանորոգման աշխատանքները, հատկապես ճանապարհային՝ շաբաթներ եւ ամիսներ: Հերթական օրինակը մեկ շաբաթ առաջ սկսվեց Մայիսի 9 փողոցում՝ Մանանդյան փողոցի հետ բանուկ խաչմերուկի անմիջական հարեւանությամբ:
Սկզբում ճանապարհածածկույթն այնպես էր քանդվել, որ երկկողմանի երթեւեկությունն ամբողջությամբ մեկ ուղղությամբ էր կատարվում:
Ամենայն հավանականությամբ, վերանորոգման աշխատանքները կապված են փողոցի հակառակ ուղղությամբ գտնվող շենքում ջրի անցկացման հետ՝ դատելով նրանից, որ բացվել է հենց ջրատար խողովակի հատվածը: Վերանորոգվող մասը, ինչը կարելի է հաճախ հանդիպել, ժապավենով առանձնացվել է: Եվ անգամ ճանապարհային նշաններ են դրվել:
Ճիշտ է, որոշ նշաններ այնքան էլ հասկանալի չեն: Այսպես, մի կողմից տեղադրվել են արագությունը սահմանափակող նշաններ եւ նշան, որը զգուշացնում է ճանապարհային աշխատանքների անցկացման մասին: Մյուս կողմից էլ տեղադրվել է «վազանցն արգելվում է» նշանը, որը երկու հոծ գծերի առկայության դեպքում մի տեսակ անտեղի է, այնտեղ, որտեղ պետք է «ճանապարհի նեղացում» նշանը տեղադրվեր: Վերանորոգման աշխատանքների պատճառով երթեւեկության երկու ուղղությունները մեկ ուղղությամբ են կատարվում եւ առանց նախօրոք զգուշացնող նշանի վարորդը տհաճ իրավիճակում էր հայտնվում:
Մեկ շաբաթ անց բաց հատվածն ինչ-որ կերպ ծածկեցին, սակայն անձրեւի եւ ինտենսիվ երթեւեկության պատճառով խորը փոսեր են առաջանում:
Խասչմերուկն, ինչպես վերեւում նշվեց, բավականին աշխույժ է, կարգավորող լուսացույց չկա եւ այստեղ հաճախ են վթարներ տեղի ուեննում: Այսպիսի «անակնկալով» վթարների վտանգները մի քանի անգամ մեծանում են:
Սակայն պատվիրատուներին, ինչպես նաեւ հսկիչ մարմիններին դա քիչ է անհանգստացնում: Իհարկե, ավելի հեշտ է խոսքերով հիանալ զարգացած երկրների կարգապահությամբ եւ աշխատասիրությամբ, իսկ գործնականում անբան եւ խուլիգան Ֆեդյայի օրինակով առաջնորդվել «աշխատանքը կսպասի» սկզբունքով:
