Հայաստանում Ֆրանսիայի արտակարգ եւ լիազոր դեսպան Ջոնաթան Լակոտը հաստատեց ավելի վաղ Ֆրանսիայի դեսպանատան հայտարարությունը, որ ադրբեջանական լրատվամիջոցներում տարածված տեղեկությունը Բաքվին զենք վաճառելու էմբարգոն չեղարկելու վերաբերյալ իրականությանը չի համապատասխանում:
Հուլիսի 12-ին կայացած մամուլի ասուլիսում դեսպանն ընդգծեց, որ Ֆրանսիան բծախնդրորեն կատարում է միջազգային օրենսդրությունից բխող իր պարտավորություննեը՝ զերծ մնալ զենքի եւ զինամթերքի մատակարարումներից, որոնք կարող են օգտագործվել Լեռնային Ղարաբաղի հակամարտության մեջ:
Ի պատասխան Հայաստանի սահմանին եւ Արցախի հետ շփման գծի երկայնքով ադրբեջանական ուժերի կուտակումներին առնչվող հարցին՝ դեսպանը շեշտեց, որ հակամարտությունը կարող է կարգավորվել միայն խաղաղ ճանապարհով: Դիվանագետը նշեց, որ նախօրեին Բրյուսելում տեղի է ունեցել Հայաստանի եւ Ադրբեջանի ԱԳ նախարարների հանդիպումը, ինչպես նաեւ Հայաստանի վարչապետ Նիկոլ Փաշինյանի հանդիպումը Ֆրանսիայի նախագահ Էմանուել Մակրոնի հետ:
«Ֆրանսիան հավատարիմ է այն դիրքորոշմանը, որի համաձայն հակամարտությունը չի կարող ուժային լուծում ունենալ, միայն խաղաղ բանակցություններով»,- նշեց դեսպանը՝ հավելելով, որ Ֆրանսիան ողջունում է Հայաստանի իշխանությունների հայտարարությունները, որ հակամարտությունը պետք է կարգավորվի միայն խաղաղ ճանապարհով:
