Սպիտակ տունը հայտնել է CNN-ի լրագրող Ջիմ Ակոստայի մշտական հավատարմագրման գործողությունը դադարեցնելու մասին չորեքշաբթի մամուլի ասուլիսի ժամանակ Դոնալդ Թրամփի հետ շփումից հետո, երբ ԱՄՆ նախագահը լրագրողին քննադատել է եւ նրա պահվածքը կոպիտ համարել, փոխանցում է «ՌԻԱ Նովոստի»-ն:
«Նախագահ Թրամփը հավատում է ազատ մամուլին եւ ակնկալում ու ողջունում է իրեն եւ վարչակազմին ուղղված սուր հարցերը: Սակայն մենք չեն հանդուրժի, որ լրագրողը հպվի աղջկան, որն ուղղակի փորձում է կատարել Սպիտակ տանը ստաժորի իր պարտականությունները… Այսօրվա միջադեպի հետեւանքով Սպիտակ տունը դադարեցնում է դրան մասնակցած լրագրողի մշտական հավատարմագրման գործողությունը մինչեւ հաջորդ իրազեկում»,- հինգշաբթի Twitter-ի իր էջում գրել է Թրամփի մամուլի քարտուղար Սառա Սանդերսը:
Հայտարարության մեջ Ակոստայի անունը չի նշվում, սակայն իրավիճակի նկարագրությունից ակնհայտ է, որ խոսքը հենց նրա մասին է: Մամուլի ասուլիսի ժամանակ Ակոստան Թրամփին հարց էր ուղղել այն մասին, թե ինչու է նա Մեքսիկայի կողմից, այսպես կոչված, ներգաղթյալների քարավանի սահմանին մոտենալը ներխուժում անվանում, երբ նրանք անգամ չեն հասել ԱՄՆ տարածք: Թրամփը հարցին պատասխանել է, բայց Ակոստան շարունակել է հստակեցնող հարցեր տալ: Այնուհետեւ նախագահը հայտարարել է, որ Ակոստայի հարցերին այլեւս չի պատասխանի, քանի որ բավականաչափ հարցեր արդեն տվել է: Սակայն թղթակիցը շարունակել է հարցեր տալ:
Այդ ժամանակ նրան է մոտեցել մի աղջիկ, որը դահլիճում բարձրախոս էր տալիս, եւ փորձել է այն վերցնել, սակայն Ակոստան մի կողմ է թեքվել, իսկ երբ աղջկան հաջողվել է բռնել բարձրախոսը, այն կրկին հետ է քաշել: Միայն որոշ հապաղումից հետո է նա համաձայնվել բարձրախոսը տալ:
Թրամփը նրան «կոպիտ, սարսափելի մարդ» է անվանել՝ մեղադրելով նաեւ գործընկերների նկատմամբ անհարգալից վերաբերմունքի համար, որոնք նույնպես ցանկանում են իրենց հարցերը տալ: