News
Լրահոս
News
Երեքշաբթի
Մարտ 19
Տեսնել լրահոսը

Երեւանի քաղաքապետարանի ավագանու «Լույս» խմբակցության անդամ Անի Խաչատրյանի նախաձեռնությունը, որն առնչվում է Իրինա Ռոդնինայի անվան գեղասահքի դպրոցի վերանվանմանը, արդեն գրեթե մեկ ամիս արծարծվում է հայկական լրատվամիջոցներում: Ինչպես հայտնի է, այս նախաձեռնության պատճառը Բաքվում Ռոդնինայի կատարած հայտարարություններն էին: Այսօր քաղաքապետարանի մամուլի ծառայությունը տեղեկացրել է, որ Անի Խաչատրյանի նախաձեռնությունը կքննարկվի ավագանու մարտի 26-ի նիստում: Ընդ որում՝ որոշ լրատվամիջոցներ, վկայակոչելով անձամբ Խաչատրյանին, հայտնել էին, որ դպրոցի հիմնադիր, «Մոնարխ» ընկերությունների խմբի գլխավոր տնօրեն, բարերար Սերգեյ Համբարձումյանն իբր դեմ չէ այս որոշմանը:

NEWS.am-ին հաջողվեց զրուցել «Մոնարխ» ընկերությունների խմբի իրավաբանական հարցերով եւ տնտեսական անվտանգության պատասխանատու Արմեն Գինոսյանի հետ, որն այս կապակցությամբ ծայրահեղ տարակուսանք հայտնեց: Նա նշեց, որ դեռեւս մի քանի օր առաջ Անի Խաչատրյանն իր հետ հեռախոսով քննարկել է հնարավոր վերանվանման հարցը եւ տեղեկացվել, որ Համբարձումյանը կտրականապես դեմ է վերանվանմանը եւ չի պատրաստվում իր դիրքորոշումը փոխել. «Անչափ տարօրինակ է, որ Խաչատրյանը հայտարարում է Համբարձումյանի համաձայնության մասին, քանի որ զրույցի ժամանակ ես միանշանակ հայտարարեցի, որ մենք դեմ ենք»:

Ավելի ուշ NEWS.am-ին հաջողվեց կապ հաստատել նաեւ անձամբ Սերգեյ Համբարձումյանի հետ: «Այո, ես կտրականապես դեմ եմ դպրոցի վերանվանմանը: Դպրոցը Երեւանին է նվիրվել արդեն Իրինա Ռոդնինայի անվան շնորհմամբ, եւ սա հայտնի փաստ է: Ռոդնինան, չնայած ինձ համար անընդունելի հայտարարություններին, որ կատարել է Բաքվում, մնում է լենգենդար մարզիկ, եւ ես մտադիր չեմ մոռացության մատնելու նրա վաստակը, բարեկամական հարաբերությունները եւ հայ երեխաներին իր վարպետությունը սովորեցնելու նրա անկեղծ պատրաստակամությունը: Միաժամանակ, ես Իրինա Կոնստանտինովնային փոխանցեցի նյութեր՝ Բաքվում նրա արծարծած պատմական իրադարձությունների վերաբերյալ եւ հույս ունեմ, որ նրան հասցրեցի դրանց մասին ճշմարտությունը»,- նշեց Համբարձումյանը:

!
Այս նյութը հասանելի է նաև   Русский
Տպել
Ամենաշատ