Հայ Առաքելական եկեղեցու գլխավոր խնդիրներից մեկը պատրիարքի ընտրության միասնական կանոնադրության բացակայությունն է։ Այս մասին հուլիսի 1-ին լրագրողների հետ հանդիպմանն ասել է թյուրքագետ Տիրան Լոքմագյոզյանը։

Փորձագետն ասել է, որ նման կանոնադրությունը պետք է ընդունվի Հայ Առաքելական ամբողջ եկեղեցու ներկայացուցիչների կողմից։ «19-րդ դարի կանոնադրությունը, բնականաբար, հնացել է եւ չի կարող օգտագործվել արդի իրողություններում։ Նոր կանոնադրության ընդունումը կարող է նաեւ կանխել թուրքական պետության միջամտությունը եկեղեցու ներքին գործընթացներին, այդ թվում պատրիարքի ընտրությանը։ Այս խնդիրը հրատապ է դառնում ամեն ընտրությունից առաջ, բայց այն լուծում չի ստանում, ինչպես եղավ Մութաֆյանի պարագայում»,- նշել է նա։ Տիրան Լոքմագյոզյանը բացատրել է, որ այսօր նման հարցերը լուծվում են, ըստ էության, փակ, հոգեւոր խորհրդի կողմից։ «Բացի այդ, կան սահմանափակումներ, որոնց համաձայն՝ Կոստանդնուպոլսի պատրիարքի ընտրություններին կարող է մասնակցել միայն Ստամբուլի բարձրագույն հոգեւորականությունը։ Դա նշանակում է, որ ընտրություններին կարող են մասնակցել միայն արքեպիսկոպոս Արամ Աթեշյանը եւ եպիսկոպոս Սահակ Մաշալյանը, որոնք լարված հարաբերություններ ունեն»,- ամփոփել է փորձագետը։

Հիշեցնենք, որ մարտի 8-ին Ստամբուլում, երկարատեւ հիվանդությունից հետո վախճանվեց Հայ Առաքելական եկեղեցու Կոստանդնուպոլսի պատրիարք Մեսրոպ Մութաֆյանը։ Թուրքիայի կառավարության որոշմամբ պատրիարքի գործառույթներն այժմ կատարում է արքեպիսկոպոս Արամ Աթեշյանը։ Հայ Առաքելական եկեղեցու Կոստանդնուպոլսի պատրիարքի ընտրությունները տեղի կունենան հուլիսի 4-ին։