նախընտրելի դարձնելԳյումրիի Վարդան Աճեմյանի անվան դրամատիկական թատրոնում, ապրիլի 10-ին, տեղի է ունեցել «Վերածնունդ» միջազգային փառատոնի պաշտոնական բացումը: Միջոցառմանը ներկա են եղել առաջին տիկին Ռիտա Սարգսյանը, մշակույթի նախարար Հասմիկ Պեղոսյանը, «Փյունիկ» մարդկային ռեսուսների զարգացման հիմնադրամի հոգաբարձուների խորհրդի նախագահ` Լեւոն Սարգսյանը, Շիրակի մարզպետն ու Գյումրիի քաղաքապետը, Երեւանի պետական կոնսերվատորիայի ռեկտոր պրոֆեսոր Շահեն Շահինյանը, ինչպես նաեւ Գյումրու արվեստասեր հասարակությունը:
Փառատոնի բացումն ազդարարել է Հայաստանի պետական երիտասարդական նվագախումբը՝ գեղարվեստական ղեկավար եւ գլխավոր դիրիժոր Սերգեյ Սմբատյանի գլխավորությամբ: Պետական երիտասարդական նվագախումբը արդեն երկրորդ անգամ է, ինչ ազդարարում է այս փառատոնի մեկնարկը:
«Այսօր Գյումրիում անցկացվում է միջազգային փառատոն, որում շատ կարեւորվում է երիտասարդների մասնակցությունը: Եվ հատկանշական է, որ միջոցառմանը ոչ միայն մասնակցում են բազմաթիվ երիտասարդներ, այլեւ հենց հանդիսատեսի մեծամասնությունն էլ երիտասարդներն են. որը մեկ անգամ եւս ապացուցում է երիտասարդների դասական երաժշտության նկատմամբ անտարբեր չլինելը»,-ասել է դիրիժոր Սերգեյ Սմբատյանը:
