Նախընտրելի
Հուլիսին Եվրամիությունը Չինաստանից ներմուծել է 3,10 եվրոյի ապրանք յուրաքանչյուր այն մեկ եվրոյի դիմաց, որ արտահանվել է ՉԺՀ, իսկ երկկողմ առևտրի դեֆիցիտը գերազանցել է օրական 1 միլիարդ եվրոն։ Դրա մասին են վկայում Չինաստանի մաքսային տվյալները, որոնք վերլուծել է Mercator Institute for China Studies (Merics)-ը, գրում է The Guardian-ը։
Ըստ այս տվյալների՝ հուլիսին ԵՄ-ի առևտրային դեֆիցիտը Չինաստանի հետ կազմել է 36,5 միլիարդ եվրո՝ մեկ տարի առաջվա 32,2 միլիարդ եվրոյի դիմաց։ 2026 թվականի առաջին յոթ ամիսներին այն հասել է 234 միլիարդ եվրոյի՝ մոտ 21 միլիարդ եվրոյով ավելի, քան 2025 թվականի նույն ժամանակահատվածում։
«Խնդիրն այլևս միայն այն չէ, որ ԵՄ-ն ավելի շատ չինական ապրանք է գնում։ Չինաստանը Եվրոպային ավելի շատ է վաճառում՝ միաժամանակ նրանից ավելի քիչ գնելով»,- նշում են Merics-ի վերլուծաբանները։
Նրանց տվյալներով՝ հուլիսին Չինաստան արտահանված Եվրամիության ապրանքների յուրաքանչյուր 1 եվրոյի դիմաց բաժին է ընկել 3,10 եվրոյի ներմուծում։ Առևտրի միջին օրական դեֆիցիտը կազմել է 1,18 միլիարդ եվրո։
Նոր տվյալները հրապարակվել են ԱՄՆ նախագահ Դոնալդ Թրամփի և ՉԺՀ նախագահ Սի Ծինպինի՝ սեպտեմբերի 24-ին Վաշինգտոնում անցկացվելիք հանդիպման նախօրեին։ ԵՄ-ի և Չինաստանի միջև առևտրային անհավասարակշռությունը պետք է դառնա նաև Եվրամիության և Պեկինի առաջիկա բանակցությունների թեմաներից մեկը։ ԵՄ առևտրի հանձնակատար Մարոշ Շեֆչովիչը հոկտեմբերի 8-ին կայցելի Չինաստան։
Եվրահանձնաժողովը ավելի վաղ հայտարարել էր առևտրային անհավասարակշռությունը կրճատելու անհրաժեշտության մասին։
Բրյուսելում, ըստ The Guardian-ի, քննարկում են Չինաստանից հիբրիդային ավտոմեքենաների և քիմիական որոշ տեսակների ներմուծման քվոտաներ սահմանելու հնարավորությունը։
Հատուկ ուշադրություն է գրավել էլեկտրացանցից լիցքավորում չպահանջող հիբրիդային ավտոմեքենաների մատակարարումների աճը։ Երբ Եվրամիությունը 2024 թվականին լրացուցիչ մաքսատուրքեր սահմանեց չինական էլեկտրամոբիլների վրա, հիբրիդային մոդելները այդ միջոցների ազդեցության տակ չընկան։ Դրանց ներմուծումը կտրուկ աճեց՝ 2024 թվականի հոկտեմբերին ԵՄ-ում վաճառված քիչ ավելի քան 4 հազար ավտոմեքենայից մինչև 2026 թվականի հուլիսին 50 հազար։
