Ֆրանսիայի նախագահ Էմանուել Մակրոնը հայտարարել է, թե ԱՄՆ նախագահ Դոնալդ Թրամփին զգուշացրել է, որ ամերիկյան նավթի արտահանման դադարեցումը սխալ կլինի։ Դրա մասին Ֆրանսիայի նախագահը պատմել է շաբաթվա սկզբին ՄԱԿ-ում Թրամփի հետ հանդիպումից հետո։

«Ես նրան ասացի, որ դա վատ որոշում կլինի»,- հինգշաբթի TF1 և France 2 հեռուստաալիքներին տված հարցազրույցում հայտարարել է Մակրոնը։ Ըստ նրա՝ Ֆրանսիան ամերիկյան նավթից «ուղղակիորեն կախված չէ», սակայն նման քայլը «կհանգեցնի գների աճի»։

Թրամփի վարչակազմը հայտարարել է, որ դիտարկում է ԱՄՆ-ից նավթի արտահանման դադարեցման հնարավորությունը՝ մի քայլ, որը կարող է հանգեցնել ավտոլցակայաններում առանց այդ էլ բարձր վառելիքի գների էլ ավելի մեծ աճի։

Ավելի վաղ Politico-ն հայտնել էր, որ Թրամփի վարչակազմը դիզելային վառելիքի արտահանման վրա 90-օրյա արգելք սահմանելու մասին հրամանագրի նախագիծ է պատրաստում։