ԵՄ պաշտոնական ներկայացուցիչ Քրիստիան Վիգանդը հաստատել է, որ Բրյուսելն առաջվա պես աջակցում է Կիպրոսի թեկնածությանը։

Վրաստանը ձգտում է 2027 թվականին ստանձնել ԵԱՀԿ նախագահությունը, սակայն Եվրամիությունը դեմ է նրա թեկնածությանը։ Այս մասին հայտնել է բրյուսելյան Rapporteur (նախկին Euractiv) պորտալը։

Վրաստանի արտգործնախարար Մակա Բոչորիշվիլին հայտարարել է, որ Թբիլիսին շահագրգռված է նախագահությամբ և պատրաստ է համագործակցել կազմակերպության անդամ բոլոր պետությունների հետ։ Սակայն Եվրամիությունը դեմ է վրացական հայտին։ ԵՄ պաշտոնական ներկայացուցիչ Քրիստիան Վիգանդը հաստատել է, որ Բրյուսելը նախկինի պես սատարում է Կիպրոսի թեկնածությունը և այլընտրանքներ չի քննարկում, նշում է պորտալը։

ԵԱՀԿ-ն շարունակում է փակուղում մնալ 2027 թվականի նախագահության հարցում։ Կիպրոսը միակ պաշտոնական թեկնածուն է, սակայն Թուրքիան արգելափակում է նրա առաջադրումը։ Սա Վրաստանին հնարավորություն է տալիս ներկայանալ որպես այլընտրանք։ Պարբերականի տվյալներով՝ Մերձբալթյան երկրներն առանձնապես բացասաբար են տրամադրված Վրաստանի թեկնածության նկատմամբ։

ԵԱՀԿ նախարարական խորհրդի հաջորդ նիստը տեղի կունենա Լուգանոյում՝ դեկտեմբերի 3-4-ին։