նախընտրելի դարձնել
Իսրայելի Ընդհանուր անվտանգության ծառայության (ՇԱԲԱԿ) նախկին ղեկավար Ռոնեն Բարը զրպարտության հայց է ներկայացրել վարչապետ Բենիամին Նեթանյահուի դեմ։ Պատճառը կառավարության ղեկավարի հայտարարություններն էին, ըստ որոնց Բարը գիտեր ՀԱՄԱՍ-ի հարձակման սպառնալիքի մասին 2023 թվականի հոկտեմբերի 7-ի հարձակումից մի քանի ժամ առաջ, սակայն չէր նախազգուշացրել Իսրայելի վարչապետին, հայտնում է The Times of Israel-ը:
Բարը պահանջում է իրեն վճարել 3 միլիոն շեկել՝ մոտ 975 հազար ԱՄՆ դոլար։ Հայցում նա թվարկել է հարձակման գիշերը ՇԱԲԱԿ-ի ձեռնարկած գործողությունները, ինչպես նաև այն նախազգուշացումները, որոնք նախորդ ամիսներին ուղարկել էր Նեթանյահուին։ Մասնավորապես, հատուկ ծառայության նախկին ղեկավարը պնդում է, որ հոկտեմբերի 7-ի առավոտյան 3:55-ին վարչապետի ռազմական քարտուղարության աշխատակազմը տեղեկացվել էր իրավիճակի մասին։
Բարը նշել է, որ 2023 թվականի հուլիսի 23-ին պաշտպանված կապի միջոցով զրույցի ժամանակ նա Նեթանյահուին «պատերազմի մասին ռազմավարական նախազգուշացում» է փոխանցել։ Նա հայտարարել է, որ Իսրայելի հակառակորդները երկրում ներքին քաղաքական պառակտումն ընկալում են որպես հարձակման հնարավորություն, և ընդգծել է կանխարգելիչ գործողությունների անհրաժեշտությունը։
Օգոստոսի 21-ի աշխատանքային հանդիպման ժամանակ Բարը, ինչպես նշվում է հայցում, նախազգուշացրել է Գազայի հատվածից հարձակումների նախապատրաստման կտրուկ ակտիվացման մասին և հայտարարել, որ առանց հարձակողական գործողությունների իրավիճակը փոխել չի հաջողվի։ Սեպտեմբերի 14-ին նա վարչապետին տեղեկացրել է հակառակորդից ստացված անսովոր ազդանշանի մասին՝ չբացահայտելով դրա բովանդակությունը։ Երեք օր անց, Բարի պատմելով, նա կրկին նախազգուշացրել է հակամարտության սրման և զսպումն ամրապնդելու անհրաժեշտության մասին։
2023 թվականի հոկտեմբերի 1-ին ՇԱԲԱԿ-ի նախկին ղեկավարը, ըստ իր ներկայացրած վարկածի, հայտնել է ահաբեկչական խմբավորումների կողմից հարձակումներ իրականացնելու մտադրությունների գագաթնակետի մասին և նախազգուշացրել, որ Իսրայելը մինչև տոնական շրջանի ավարտը կարող է ներքաշվել մարտական գործողությունների մեջ։ Նա առաջարկել է ահաբեկչական կազմակերպությունների առանցքային առաջնորդների թիրախային ոչնչացում, սակայն այդ առաջարկությունը, ինչպես պնդում է Բարը, չի իրականացվել։
Միևնույն ժամանակ հատուկ ծառայության նախկին ղեկավարն ընդունել է հետախուզության ձախողման համար սեփական պատասխանատվությունը։ Նա հայտարարել է, որ ՇԱԲԱԿ-ը չի կարողացել ամբողջ ծավալով տրամադրել անհրաժեշտ տեղեկությունը նախապատրաստվող հարձակման և դրա իրականացման ժամանակի վերաբերյալ։ Բարը նշել է, որ հենց այդ պատճառով էլ հրաժարական է տվել, և ընդգծել, որ չի փորձում խուսափել պատասխանատվությունից։
Բարը նշել է, որ ավելի վաղ նա ակնկալում էր, որ հատուկ ծառայության գործողություններն ու թույլ տրված սխալները կքննարկի պետական քննչական հանձնաժողովը։ Սակայն Նեթանյահուի կողմից նոր մեղադրանքներից հետո նա որոշել է դիմել դատարան։
Վարչապետի հայտարարությունները հնչել են այն հաղորդումների հետնապատկերին, ըստ որոնց Իսրայելի ղեկավարությունը մինչև 2023 թվականի հոկտեմբերի 7-ը ստացել էր նախազգուշացումներ ՀԱՄԱՍ-ի հնարավոր հարձակման մասին։ Իսրայելի հարավի վրա հարձակման ընթացքում զոհվել է մոտ 1,2 հազար մարդ, ևս 251 մարդ գերեվարվել է որպես պատանդ։ Հարձակումը դարձել է պատերազմի սկիզբը։
