Իսրայելի վարչապետ Բենիամին Նեթանյահուն հայտարարել է, որ 2025 թվականի հուլիսին Դամասկոսին հասցված իսրայելական հարվածներից հետո հեռախոսով զրուցել է Սիրիայի նախագահ Ահմեդ Շարաայի հետ, հայտնում է The Times of Israel-ը։

Ըստ Նեթանյահուի՝ այդ զրույցից հետո Սիրիայի հարավում դրուզների զանգվածային սպանությունները դադարել են։

Իսրայելի կառավարության ղեկավարը դրա մասին պատմել է «Լիկուդ» կուսակցության՝ դրուզական համայնքին նվիրված համաժողովում։ «Ես վերցրի հեռախոսը և զանգահարեցի Շարաային։ Դա շատ կարճ և շատ կոշտ զրույց էր։ Եվ [Սիրիայում դրուզների] սպանությունները դադարեցին»,- հայտարարել է Նեթանյահուն։

Սա Նեթանյահուի և Շարաայի միջև ուղիղ զրույցի մասին առաջին հայտնի հրապարակային հաղորդումն է։ Վերջինս իշխանության էր եկել 2024 թվականի վերջին՝ Բաշար Ասադի տապալումից հետո, որը երկար տարիներ ղեկավարել էր Սիրիան։ Իսրայելը և Սիրիան դիվանագիտական հարաբերություններ չունեն և բազմիցս պատերազմել են միմյանց դեմ։ Հետևաբար, այս զրույցը կարող է լինել երկու երկրների առաջնորդների միջև պատմության մեջ առաջին ուղիղ շփումը։

2025 թվականի հուլիսին Իսրայելը հարվածներ է հասցրել Սիրիայի պաշտպանության նախարարությանը և Դամասկոսում նախագահական պալատի մերձակա օբյեկտներին։ Իսրայելի իշխանությունները հայտարարում էին, որ գործողության նպատակը Սիրիայի հարավում դրուզների պաշտպանությունն էր, որտեղ Էս-Սուվեյդայի շրջանում, որը բնակեցված է հիմնականում այդ կրոնական համայնքի ներկայացուցիչներով, միջհամայնքային բախումներ էին բռնկվել։

«Ես կանեմ ինձանից կախված ամեն ինչ՝ մեր եղբայրներին և ձեր եղբայրներին պաշտպանելու համար»,- ասել է Նեթանյահուն՝ դիմելով համաժողովի մասնակիցներին։

Ներկայում Իսրայելը և Շարաայի կառավարությունը բանակցություններ են վարում անվտանգության ոլորտում համաձայնագրի շուրջ։ Սիրիական կողմը պահանջում է դուրս բերել իսրայելական զորքերը սահմանային բուֆերային գոտուց, որը Իսրայելի պաշտպանության բանակը զբաղեցրել էր Ասադի տապալումից հետո։