նախընտրելի դարձնելՀայկական ծագում ունեցող Թուրքիայի քաղաքացին, ով ֆինանսական խնդիրների պատճառով թաղվել էր մահմեդական գերեզմանոցում, կվերաթաղվի հայկական գերեզմանոցում այն բանից հետո, երբ կավարտվեն բոլոր անհրաժեշտ ընթացակարգերը: Այս մասին հայտնում է թուրքական «Hürriyet Daily News»:
Հիշեցնենք, որ 85-ամյա Հարություն Կամպարիսիօղլուն մահացել էր հունիսի 17-ին, հայտնել էր «Ակոս» շաբատաթերթը անցած շաբաթ: Սկյութարի Սուրբ Կարապետ եկեղեցու հիմնադրամը հավանություն էր տվել Կամպարիսօղլուի թաղմանը իսլամական ավանդույթների համաձայն, քանի որ նրա աղջիկը` Աննա Թաշչյանը չէր կարողացել մուծել թաղման համար անհրաժեշտ 8000 թուրքական լիրա:
Հայկական պատրիարքարանը հայտարարել է, որ չի իմացել կատարվածի մասին: «Եթե մենք իմանայինք իրավիճակի մասին, մենք կանեինք անհրաժեշտ ամեն ինչ և թույլ չէինք տա, որպեսզի այդպես ստացվեր: Իսկ թե ինչպես են իշխանությունները թույլ տվել այդպիսի հուղարկավորություն, դա արդեն մեզ հետաքրքրող այլ հարց է»,– ասել է պատրիարքի պարտականությունները կատարող Արամ արքեպիսկոպոս Աթեշյանը:
«Ընտանիքը շատ հայտնի է և բարեկեցիկ, սակայն այն չի ցանկացել վճարել թաղման համար անհրաժեշտ ծախսերը: Եթե մենք մտածեինք, որ նրանք իսկապես կարիքավոր են, մենք կդիմեինք պատրիարքարան` օգնության խնդրանքով: Իհարկե, նա կարող էր թաղվել անվճար, բայց նախ և առաջ պետք է ապացուցվեր նրա աղքատությունը»,– ասել է Սուրբ Կարապետ եկեղեցու հիմնադրամի ներկայացուցիչ Օշին Մումջույանը:
Այնուհադերձ Աթեշյանը հայտնել է, որ հանգուցյալի ընտանիքը իրենց չի դիմել:
Նա ասել է, որ հանգուցյալի աղջիկը համաձայնություն է տվել Հայ Առաքելական եկեղեցու ավանդույթների համաձայն հուղարկավորությանը և որ Կամպարիսօղլուի մարմինը անհրաժեշտ արարողություններից հետո վերաթաղվի հայկական գերեզմանոցում:
Մինչդեռ Ղարաջաախմետ գերեզմանոցի տնօրինությունը, որը հավանություն էր տվել Կամպարիսօղլուի հուղարկավորությանը իսլամական ավանդույթներով, հայտարարել է, որ ոչ մահմեդականները կարող են թաղվել մահմեդական գերեզմանատներում այն դեպքում, երբ հայտարարվում է, որ մահացածը մահմեդական է դարձել: «Կամպարիսօղլուն հայտարարվել էր մահմեդական: Կա երկու մարդ, որոնք վկա են եղել նրա իսլամ ընդունմանը»,– հայտարարել է տնօրինությունը:
