«Հրապարակը» գրում է, որ ՊՆ ԶՈւ գլխավոր շտաբի պետի տեղակալներին ազատելուց հետո այդ պաշտոնները դեռ թափուր են: Այս պաշտոններում նշանակումն ու ազատումը կատարվում են Սերժ Սարգսյանի հրամանով:

Եթե մյուս ոլորտներում շատ արագ գտնվում է թեկնածուն, ապա այստեղ Սերժ Սարգսյանը ծանրութեթեւ է անում եւ չի կողմնորոշվում, թե խայտառակ բացահայտումներից հետո թափուր մնացած պաշտոններն ում վստահի:

Հիշեցնենք, որ Վալերի Նարիմանիչ Գրիգորյանը, ով ավելի քան մեկ ամիս առաջ ազատվեց, զորակոչի գծով պատասխանատուն էր, իսկ Արշալույս Փայտյանը՝ սպառազինության, գնումների, սննդամթերքի մատակարարման:

Թեեւ պաշտոնապես չեն հայտարարում, սակայն, որոշ լուրերի համաձայն, վերջինս ազատվել է տավարի մսի փոխարեն գոմեշի սառած բրիկետներ բանակին «մատակարարելու» համար: Որոշ տեղեկությունների համաձայն, Փայտյանն իր նեղ շրջապատում նեղսրտել է, թե իր ոտքի տակ փորողը մյուս տեղակալ Հայկազ Բաղմանյանն է: Հակառակ դեպքում գոմեշի միսն այն պատճառը չէր, որի համար իրեն ազատեին, առավել եւս, որ դա բանակում նորություն չէր: