նախընտրելի դարձնել
Հոկտեմբերի 12-ին ՀՀ ոստիկանությունում տեղի ունեցավ օպերատիվ խորհրդակցություն, որը վարում էր ոստիկանության պետ, գեներալ-լեյտենանտ Վլադիմիր Գասպարյանը: Մասնակցում էին ոստիկանության կոլեգիայի անդամներ, կենտրոնական ապարատի, գլխավոր վարչությունների, Երեւան քաղաքի եւ մարզային վարչությունների, ոստիկանության բաժինների պետեր, այլ ստորաբաժանումների ու ծառայությունների ղեկավարներ:
Ոստիկանության լրատվության վարչությունից հայտնում են, թե օրակարգում 2012 թվականի ինն ամիսների ընթացքում ոստիկանության մարմինների գործունեության արդյունքների ամփոփումն էր:
Ոստիկանության մայրաքաղաքի եւ մարզային ստորաբաժանումների ղեկավարները, ոստիկանության պետի հորդորով գերազանցապես անդրադարձան իրենց ծառայությունների աշխատանքում առկա թերություններին ու բացթողումներին, որոնք ոչ միայն ստվերում են ոստիկանության գործունեության մեջ նկատելի առաջընթացը, այլեւ խոչընդոտում համակարգի հանդեպ հասարակության հավատի ամրապնդմանը:
Կարեւորելով անչափահասների մասնակցությամբ իրականացվող միջոցառումները` Վլադիմիր Գասպարյանը հանձնարարեց կրթության եւ գիտության նախարարության հետ համատեղ մշակել ծրագիր` նաեւ բարձրագույն ուսումնական հաստատություններում նման միջոցառումներ կազմակերպելու նկատառումով:
Վլադիմիր Գասպարյանը ոստիկանության մարզային կառույցների ղեկավարների ուշադրությունը հրավիրեց հատկապես անասնագողության, ապօրինի անտառահատման, որսագողության դեպքերի արագ ու անվերապահ բացահայտմանը` վերստին կարեւորելով գյուղացու ունեցվածքն ու ապրուստը ամեն կարգի ոտնձգություններից պաշտպանելու` ոստիկանության պարտականությունը:
Անդրադառնալով հանցագործությունները գրանցումից թաքցնելու արատավոր երեւույթին, որը լիովին արմատախիլ չի արվել` Վլադիմիր Գասպարյանը շեշտեց նաեւ հասարակական հնչեղություն ունեցող, նախկինում կատարված հանցագործությունների, ինչպես եւ բնակարանային գողությունների բացահայտման գործում առկա թերությունները եւ այդ ուղղությամբ լուրջ արդյունքների հասնելու առումով կարեւորեց տեղամասային տեսուչների ինստիտուտի որակական կատարելագործման անհրաժեշտությունը:
Դրական գնահատելով հանրությանը ծառայություններ մատուցող ստորաբաժանումների աշխատանքում արձանագրված տեղաշարժը` Վլադիմիր Գասպարյանը հանձնարարեց չբավարարվել ձեռք բերված արդյունքներով, շարունակել եւ անշրջելի դարձնել այդ գործընթացը:
Ոստիկանության պետը տեղեկացրեց նաեւ, որ ՊՊԾ հատուկ երեւանյան գումարտակի օրինակով առաջիկայում ստորաբաժանում է ձեւավորվելու Գյումրիում, ապա եւ` մյուս մարզային կենտրոններում, ինչը քաղաքացիներին ծառայություններ մատուցելու որակական նոր աստիճան է:
Օպերատիվ խորհրդակցության ավարտին հրապարակվեցին ոստիկանության պետ, գեներալ-լեյտենանտ Վլադիմիր Գասպարյանի հրամանները մի շարք կադրային փոփոխությունների մասին:
