Նախընտրելի«Կասպերսկիի լաբորատորիայի» մասնագետների բացահայտած «Կարմիր հոկտեմբեր» կիբերլրտեսական խոշոր ցանցն աստիճանաբար դադարեցնում է աշխատանքը, գրում է Mashable-ը՝ վկայակոչելով տեղեկատվության ազատության ոլորտի մասնագետների հայտարարությունները:
Այսպես, ըստ Rapid7 ընկերության ուսումնասիրող Կլաուդիո Գուարնիերիի, կիբերլրտեսական ցանցի ենթակառույցը ներկայումս գրեթե ամբողջովին ապամոնտաժվել կամ «այլ վայր է տեղափոխվել»: Նրա հետ համամիտ է «Կասպերսկիի լաբորատորիայի» աշխատակից Կոստին Ռայուն, որը հայտարարել է, որ ցանցն սկսել է «անհետանալ» հունվարի 14-ի լույս 15-ի գիշերը, գրում է «Ռոսիյսկայա գազետան»:
«Կարմիր հոկտեմբեր» կիբերլրտեսական ցանցի հայտնաբերման մասին հայտնի էր դարձել նախորդ շաբաթ: Ըստ փորձագետների՝ կիբերլրտեսները գաղտնի տեղեկություններ եւ աշխարհաքաղաքական տվյալներ են որսում: Նրանց հիմնական թիրախը ամբողջ աշխարհում դիվանագիտական եւ կառավարական կառույցներն են: Հարձակման ենթարկված երկրների ցուցակում է նաեւ Հայաստանը:
