Նախընտրելի
Անկարայում ԱՄՆ-ի դեսպանատան մոտ իրեն պայթեցրած մահապարտն ավելի վաղ քաղաքական ապաստան էր խնդրել Գերմանիայից, սակայն մերժվել էր:
«Հեղափոխական ժողովրդա-ազատագրական կուսակցություն-ճակատի» (DHKP-C) անդամ Էջեվիտ Շանլին 1997թ. Թուրքիայում ահաբեկչական գործունեության համար դատապարտվել էր ազատազրկման, սակայն ազատ էր արձակվել, երբ փորձաքննությունը ցույց էր տվել, որ նա հոգեկան հիվանդություն ունի:
2001թ. Շանլին Թուրքիայից փախել էր եւ քաղաքական ապաստան խնդրել ԳԴՀ-ում, սակայն մերժում էր ստացել, քանի որ քաղաքական հետապնդման չէր ենթարկվել: Ըստ գերմանական լրատվամիջոցների` իշխանությունները չեն հետեւել Շանլիին, կարծելով, որ նա «վտանգ չի ներկայացնում»: Երկու շաբաթ առաջ նա անօրինական ճանապարհով Գերմանիայից Ստամբուլ էր ժամանել Հունաստանով եւ եկել Անկարա, հաղորդում է «ՌԻԱ Նովոստին»:
Հիշեցնենք, որ ահաբեկչութւյան հետեւանքով զոհվել էր ԱՄՆ-ի դեսպանատան թուրք հսկիչը: Վնասվածքներով հիվանդանոցում էր հայտվել NTV հեռուստաալիքի նախկին թղթակցուհի Դիդեմ Թունջայը: Նրա կյանքին ոչինչ չի սպառնում:
DHKP-C ձախ խմբավորումը ստեղծվել է 1978թ. եւ ներկայանում է որպես ԱՄՆ-ի եւ ՆԱՏՕ-ի ընդդիմադիր: Նախկինում DHKP-C-ը ստանձնել էր ամերիկացի զինծառայողների եւ այլ արտասահմանցիների վրա հարձակումների պատասխանատվությունը: ԱՄՆ-ում եւ ԵՄ-ում խմբավորումն ընդգրկված է ահաբեկչական կազմակերպությունների ցուցակում:
