նախընտրելի դարձնելԱվելի քան 250 կազմակերպություններ ու միություններ հայտարարություն են ընդունել Տարոն Մարգարյանին սատարելու մասին:
Երեւանում գործող հասարակական կազմակերպությունների, ստեղծագործական, հայրենակցական ու ազգային փոքրամասնությունների միությունների եւ մտավորականության ներկայացուցիչներն այսօր հանդիպեցին Երեւանի ավագանու անդամության թեկնածու, Երեւանի գործող քաղաքապետ Տարոն Մարգարյանի եւ Հայաստանի Հանրապետական Կուսակցության կենտրոնական ընտրական շտաբի պատասխանատուների հետ:
Գրող, հրապարակախոս Ռազմիկ Դավոյանը, կոմպոզիտոր Ռոբերտ Ամիրխանյանը, դուդուկահար Ջիվան Գասպարյանը, նկարիչ Զուլում Գրիգորյանը, Երեւանի նախկին քաղաքապետ Մուրադ Մուրադյանը իրենց ելույթներում կարեւորելով Երեւան քաղաքի զարգացմանն ուղղված ջանքերն ու առկա դրական փոփոխությունները՝ իրենց պատրաստակամությունը հայտնեցին աջակից լինել բոլոր այն նախաձեռնություններին, որոնք իրատեսական առաջընթաց են ապահովում մայրաքաղաքի համար: Երեւանի ավագանու անդամության թեկնածու, Երեւանի գործող քաղաքապետ Տարոն Մարգարյանը ներկայացնելով Երեւան քաղաքի զարգացման տեսլականն ու իրականացվող ծրագրերի շարունակականության հեռանկարը, հավաստիացրեց, որ երեւանցիների վստահության քվեն ստանալով, թիմը պատրաստակամ է շարունակել ամեն դրականն ու լավը՝ ստեղծելով ավելի բարեկարգ, ավելի նաքուր, ավելի կանաչ ու լուսավոր, ավելի լավ Երեւան ունենալու համար:
Հանդիպմանը մասնակից ավելի քան 250 կազմակերպություններ ու միություններ հանդես եկան համատեղ հայտարարությամբ.
Հայտարարություն
Մենք` Համագործակցություն հանուն քաղաքացիական հասարակության զարգացման նախաձեռնության մասնակից հասարակական կազմակերպությունների, ստեղծագործական, հայրենակցական ու ազգային փոքրամասնությունների միությունների եւ մտավորականության ներկայացուցիչներս անչափ բարձր ենք գնահատում բոլոր այն ջանքերը, որոնք ուղղված են Երեւանի զարգացմանն ու արդիականացմանը։ Գիտակցելով մեր պարտականությունները քաղաքացիական հասարակության կայացման գործում եւ հաշվի առնելով քաղաքապետի թեկնածու, գործող քաղաքապետ Տարոն Մարգարյանի ծրագրային հիմնադրույթները, նրա կողմից բոլոր ծրագրերը կյանքի կոչելու իրական հնարավորությունները, ինչպես նաեւ մայրաքաղաքի բնակիչների մեծամասնության մոտ ձեւավորված դրական նկարագիրը` կոչ ենք անում.
• ակտիվորեն մասնակցել Երեւանի ավագանու ընտրություններին,
• կատարել քաղաքացիական դիրքորոշման եւ համոզմունքի վրա հիմնված գիտակցված ընտրություն,
• քվեարկել Հայաստանի հանրապետական կուսակցության ավագանու ցուցակի եւ քաղաքապետի թեկնածու Տարոն Մարգարյանի օգտին։
Հարկ ենք համարում նշել, մեր համոզմունքն առ այն, որ Տարոն Մարգարյանը, ընտրվելու դեպքում, իր թիմի հետ միասին աշխատանքային հետագա տարիները առավել արգասաբեր եւ արդյունավետ կօգտագործի` ի նպաստ բարեկարգ, հարմարավետ, գրավիչ մայրաքաղաք` ավելի լավ Երեւան ունենալու մեր սպասումներին:
