նախընտրելի դարձնելՄոսկվայի հյուսիսում ուղերթային ավտոբուսի պայթյունի փաստով, որի հետեւանքով տուժել էր երկու մարդ, քրեական գործ է հարուցվել: Ավտոբուսներում որպես վառելիք գազ օգտագործելու փորձնական համակարգի կիրառումը ժամանակավորապես դադարեցվել է:
Ավելի վաղ NEWS.am-ը հայտնել էր, որ մայիսի 9-ին, Մոսկվայում ավտոբուսում գազի բալոն էր պայթել, որի հետեւանքով տուժել էր 44-ամյա մի կին ու 8-ամյա մի աղջնակ: Պայթյունի պահին նրանք անցնելիս էին եղել ավտոբուսի կողքով: Ըստ Vesti.ru-ի երեխայի վիճակը ծայրահեղ ծանր է, նրա տեղափոխել են Տուշինյան մանկական հիվանդանոց: Կինը եւս տեղափոխվել է հիվանդանոց:
«ԼիԱԶ» մակնիշի ավտոբուսը կանգնած է եղել իր երթուղու վերջին կանգառում, ներսում ուղեւորներ չեն եղել: Վարորդն այդ պահին գնացել էր ուղեգիրը ձեւակերպելու: Ավտոբուսը գազով է աշխատել, իսկ բալոնները գտնվել են մեքենայի տանիքին: Պայթել է 4 բալոններից մեկը: Ընդ որում, պայթյունն այնպիսի ուժգին է եղել, որ ավտոբուսի պատուհանների ապակիների կտորները թռել են 200 մետր: «ԼիԱԶ»-ի տանիքը ուժեղ դեֆորմացվել է:
Ինչպես հաղորդում է Life News-ը, պայթյունի հետեւանքով կտրվել է 8-ամյա Սերաֆիմա Ե.-ի ձեռքը, իսկ 44-ամյա Ազրեթ Շունգարովայի մոտ ախտորոշել են բարոտրավմա, գանգուղեղային փակ վնասվածք եւ ոտքերի տարբեր վնասվածքներ:
Բուժման բոլոր ծախսերն իր վրա է վերցրել Մոսկվայի առողջապահության դեպարտամենտը: Նրանց նաեւ փոխհատուցում կտրվի:
Միաժամանակ որոշում է կայացվել ժամանակավորապես դադարեցնել գազով ավտոբուսների շահագործումը: Նման ավտոբուսների թիվը Մոսկվայում 50 է:
