նախընտրելի դարձնելԴաղստանի իշխանությունները Մախաչկալայում մահապարտուհու ինքնապայթեցումից 12 տուժածներին նյութական օգնություն տրամադրելու որոշում է կայացրել: Նրանց թվում են հինգ ոստիկաններ «Դաղստան» պետական հեռուստառադիոընկերության օպերատոր Անատոլի Շեւչին, որին արդեն վիրահատել են:
Ծանր վիրավորները քառորդ միլիոն ռուբլի կստանան, միջին ծանրության վնասվածք ունեցողները՝ հարյուր հազարական, իսկ թեթեւ վերքեր ունեցողները՝ 50 հազարական: Անհրաժեշտ միջոցները կտրամադրվեն տարածքային կառավարության պահուստային ֆոնդից:
Ըստ ԻՏԱՌ-ՏԱՍՍ-ի՝ ահաբեկչության հետեւանքով զոհվել է միայն մահապարտուհի Մադինա Ալիեւան՝ ավելի վաղ ոչնչացված երկու գրոհայիններից մեկի նախկին կինը: Մայիսի 13-ից նրան անհետացած էին համարում: Ֆ-1 ռումբով գոտի հագած կինը մոտեցել էր ՆԳՆ-ի շենքին եւ գործի դրել ինքնաշեն պայթուցիկը: Ռումբի պայթյունի հզորությունը կազմել էր շուրջ 500 գ՝ տրոտիլային համարժեքով:
Արտակարգ դեպքի փաստի առթիվ քրեական գործ է հարուցվել ՌԴ ՔՕ չորս հոդվածներով՝ «Մահափորձ իրավապահ մարմնի աշխատակցի դեմ», «Երկու կամ ավելի անձանց վրա հարձակում` համընդհանուր վտանգ ներկայացնող միջոցով», «Զենքի ապօրինի շրջանառություն» եւ «Պայթուցիկ սարքի ապօրինի պատրաստում»: Ըստ իրավապահ մարմինների՝ մահապարտ կնոջ թիրախը հենց ոստիկաններն են եղել, հաղորդում է vesti.ru-ն:
