նախընտրելի դարձնելՀայաստանի քաղաքացիական գործերով վերաքննիչ դատարանը հրապարակել է «Առավոտ» եւ «Հայկական ժամանակ» օրաթերթերի դեմ նախկինում 9 տարվա ազատազրկման դատապարտված Ռազմիկ Աբրահամյանի բողոքի հիման վրա կայացրած որոշումը, հաղորդում է Aravot.am-ը:
Դատարանը մերժել է պատիվն ու արժանապատվությունը նվաստացնող, բարի համբավն արատավորող սուտ տեղեկություններ տարածելու համար նյութական եւ բարոյական վնասի հատուցման համար 2-ական միլիոն դրամ յուրաքանչյուր լրատվամիջոցից բռնագանձելու Ռ.Աբրահամյանի պահանջը եւ Կենտրոն եւ Նորք-Մարաշ վարչական շրջանների ընդհանուր իրավասության դատարանի մարտի 7-ի կայացրած վճիռը թողեց ուժի մեջ: Ռազմիկ Աբրահամյանից հօգուտ պետբյուջեի կբռնագանձվի 30 000 ՀՀ դրամ, որպես վերաքննիչ բողոքի համար նախատեսված պետական տուրքի գումար: Հիշեցնենք, որ առաջին ատյանում էլ այդ գումարը 80 000 դրամ էր կազմում: Նախկինում անառակաբարո գործողություններ կատարելու համար 9 տարվա ազատազրկման դատապարտված Աբրահամյանը հայտնել էր դատարանին, որ «Առավոտ» թերթում 9 տարի առաջ տպագրված «Պեդոֆիլը կստանա՞ 2 տարի», եւ 9 տարի առաջ «Հայկական ժամանակում» տպագրված «62-ամյա պեդերաստը խոստովանել է իր մեղքը» հրապարակումները չեն համապատասխանում իրականությանը, որ լրատվամիջոցները իրեն զրպարտել են այնպիսի գործողությունների կատարման համար, որոնք ինքը չի կատարել: Մինչդեռ, նա դատարանում հաստատեց, որ իր նկատմամբ Ավան եւ Նոր-Նորք համայնքի դատարանը դատավճիռ է կայացրել: Ըստ 29.03.2004թ. դատավճռի՝ Ռազմիկ Աբրահամյանը մեղավոր է ճանաչվել ՀՀ քրեական օրենսգրքի 139 հոդվածի 3-րդ մասով, 139 հոդվածի 2-րդ մասի 3-րդ կետով: ՀՀ վերաքննիչ դատարանը որոշման պատճառաբանություններ հատվածում անդրադարձել էր լրագրողական ազատությանը, տեղեկություններ տարածելու լրագրողի ազատությանն ու Մարդու իրավունքների եվրոպական դատարանի որոշումներին: Հղում անելով «Շաբանովն ու Տրենն ընդդեմ Ռուսաստանի» ԵԴ որոշմանը, դատարանը նշել էր. «Եթե լրագրողը գործում է բարեխղճորեն եւ ճշգրիտ փաստացի հիմքերի վրա ու տրամադրում է «վստահելի» եւ «ճշգրիտ» տեղեկություն, պաշտպանված է ըստ էության Եվրոպական կոնվենցիայի 10-րդ հոդվածով: Դատարանը նաեւ հանգել էր այն հետեւության, որ Ռազմիկ Աբրահամյանի փաստարկները անհիմն են, որոնք բավարար հիմք չեն նրա վերաքննիչ բողոքը բավարարելու եւ վճիռը բեկանելու համար: Ինչ վերաբերում էր Ռազմիկ Աբրահամյանի պետական տուրքին, դատարանը տեղեկացրել էր, որ նա դիմել էր դատարան, պետական տուրքի վճարումը տարաժամկետելու միջնորդությամբ: Եվ քանի որ բողոքաբերը վիճարկել էր դատական ակտն ամբողջությամբ, որը կրում էր գույքային բնույթ, նրա բողոքը մերժելով՝ դատարանը պետական տուրքի գումարը՝ նախատեսված 30 000 դրամի չափով, բռնագանձելու է:
