նախընտրելի դարձնելԱԺ ‹‹Ժառանգություն›› խմբակցության քարտուղար Զարուհի Փոստանջյանը պատգամավորական հարցում է հղել երկրի վարչապետ Տիգրան Սարգսյանին, որտեղ անդրադառնում է Սյունիքի մարզպետ Սուրեն Խաչատրյանի «ժամանակավոր լիազորությունները վայր դնելու» հայտարարության իրավական հիմքերին:
Ստորեւ ներկայացնում ենք պատգամավորական հարցումը.
«Հարգելի պարոն Սարգսյան,
Երեկ երեկոյան ՀՀ կառավարության պաշտոնական կայքում հրապարակվել է հայտարարություն հետեւյալ վերնագրով` «Ի՞նչ է տեղի ունեցել Սյունիքի մարզպետի առանձնատան մոտ հունիսի 1-ի երեկոյան», որտեղ նկարագրված է, որպես «վկայություն», սույն թվականի հունիսի 1-ին տեղի ունեցած հանցագործության մասին՝ իբրեւ ճմարտության վերաբերյալ տեղեկատվություն: Համաձայն վերը նշված հրապարակման՝ մեջբերում եմ` «Պաշտոնական տեղեկատվության սղության ու ոչ ամբողջականության պատճառով…», «կա մի հարց՝ սկզբունքային նշանակություն ունեցող, որի մասին չենք կարող չխոսել, որի շուրջ լռություն են պահպանում անգամ շահագրգիռ մարմիններն ու լրատվամիջոցները»:
Վերը նշված հրապարակումից հետո, ի պատասխան «Ա1+»-ի հարցման՝ ՀՀ գլխավոր դատախազի մամլո խոսնակ Սոնա Տռուզյանը հայտնել է. «Փորձաքննության փուլում գտնվող տեսագրության բովանդակության վերաբերյալ չլիազորված պետական մարմնի կողմից պաշտոնական հաղորդագրության տարածումն անթույլատրելի է»:
Հիմք ընդունելով վերոգրյալը եւ ղեկավարվելով «Ազգային ժողովի կանոնակարգ» ՀՀ օրենքով՝ խնդրում եմ տրամադրել պատասխան պարզաբանում հետեւյալ հարցերի վերաբերյալ.
1. ՀՀ կառավարության պաշտոնական կայքը ինչո՞ւ է հետապնդում անօրինական նպատակ:
2. ՀՀ կառավարության պաշտոնական կայք-էջը ինչո՞ւ է շահագործվում պաշտոնատար անձանց կողմից պաշտոնական դիրքի, լիազորությունների չարաշահմամբ:
3. Եթե Դուք չեք վերը նշված հրապարակման նախաձեռնողը, ապա խնդրում եմ անցկացնել ծառայողական քննություն եւ հայտնել՝ ո՞ւմ նախաձեռնությամբ է նման հայտարարություն տեղադրվել ՀՀ կառավարության պաշտոնական կայքում:
4. Պատրաստվո՞ւմ եք վերացնել ապօրինությունը եւ միջոցներ ձեռնարկել՝ պատասխանատվության կանչելու ապօրինություն կատարողին կամ կատարողներին:
5. Պատրաստվո՞ւմ եք ներողություն խնդրել ՀՀ հարկատուներից՝ նրանց գումարներով ֆինանսավորվող ՀՀ կառավարության կայքն ապօրինի օգտագործելու համար:
Ի լրումն այս ամենի՝ խնդրում եմ անհապաղ վերացնել ապօրինի հրապարակումը»:
Լուսանկարը՝ Արսեն Սարգսյանի/NEWS.am
