Ընթացիկ տարվա հունվար-մայիս ամիսներին, անցած տարվա նույն ժամանակահատվածի համեմատ, Հայաստանում շինարարության ծավալները կրճատվել են 8,8%-ով: Դրանում սենսացիոն ոչինչ չկա,  այդ ոլորտում բացասական միտումները շարունակվում են, որոնք սկսվել էին դեռ  ճգնաժամային 2009 թ-ից: Ինչպես երեւում է գծապատկերից, շինարարության ոլորտում ամենամեծ ակտիվությունը գրանցվել է մինչճգնաժամային 2008 թ-ին, իսկ հետագայում արդեն անկում է  արձանագրվել:

 

Հիմնական պատճառը «բնակչության միջոցներով» իրականացվող շինարարության ծավալների կրճատումն է  եղել:  2008 թ-ին շահագործվել է  985 բնակելի տուն, որից 891-ը` «բանկչության միջոցների հաշվին», իսկ  84-ը` պետական միջոցների: Մնացած 10 –ը` «կազմակերպությունների»: Բնակչությունը, բնականաբար, առանձնատներ է կառուցել,  իսկ պետությունը` հիմնականում բազմաբնակարան շենքեր:

Նշենք,  որ նշված տարում «բնակչության» կողմից կատարվել են մոտ 600 մլրդ դրամի շինարարական աշխատանքներ,  անցյալ տարի այդ ցուցանիշը կազմել է 231 մլրդ դրամ:

Դիտարկելով դինամիկան` պարզ է դառնում, որ «բնակչության» կողմից իրականացված շինարարության ծավալները 2008-2012 թթ. ընթացքում կրճատվել են 2,6 անգամ: Ֆիզիկական ծավալը կրճատվել է  գրեթե  2,8 անգամ:

Մեզանում սակայն կա ապահովված քաղաքացիների մի շերտ, որոնք ոչ քիչ գումարներ են ծախսում շքեղ առանձնատների վրա: Նշենք, որ  անցած տարի շահագործվել է «բնակչության» կողմից կառուցված 586 շենք:

Հայաստանում  2000-2011թթ.  առանձնատների ֆոնդն ավելացել է գրեթե 80 հազար միավորով, իսկ բնակարանայինը` մոտ  22 հազարով: Նշենք, որ վերջիններիս թվում են նաեւ էլիտար շենքերի թանկարժեք բնակարանները, օրինակ, Հյուսիսային պողոտայում:

Հարմարավետը սենյակներով շենքերի եւ առանձնատների կառուցման աճի տեմպի հետեւանքով հանրապետության բնակչության  բնակտարածությամբ ապահովվածության միջին  ցուցանիշը 20,7 քմ-ից հասել է  27,8 քմ-ի:

Միջին ցուցանիշը, ինչպես հայտնի է, աբստրակտ հասկացություն է. մեկը կարող է նեղվածքային պայմաններ ունենալ «խրուշչովյան բնակարանում», մեկ ուրիշը` բանկավել հազար քմ-անոց ժամանակակից առանձնատանը:

Դատելով բնակարանենրի վաճառքի հայտարարություններից` հազար քմ-անոց  առանձնատները մեզանում եզակի չեն...

Ալբերտ Խաչատրյան