ԵԱՀԿ Մինսկի խմբի գործունեությունն ավելի աշխույժ կարող է լինել: Այս մասին հայտնել է ԵԱՀԿ գործող նախագահ, Ուկրաինայի արտգործնախարար Լեոնիդ Կոժարան` Երեւանում կայացած մամուլի ասուլիսում:

ԵԱՀԿ գործող նախագահը հիշեցրել է, որ Ուկրաինայի համար սառեցված հակամարտությունների կարգավորումը նախագահության կարեւորագույն խնդիրներից է:

«Ուկրաինան պարզապես շրջապատված է սառեցված հակամարտություններով` Մոլդովան, Հարավային Կովկասը: Դրանով է պայմանավորված այս հարցին ուկրաինական կողմի հատկացրած ուշադրությունը»,  - նշել է նախարարը: Ըստ նրա` Ուկրաինան կարծում է, որ  անհրաժեշտ է աշխույժ գործընթաց պահպանել, հանդիպումներ անցկացնել տարբեր ձեւաչափերով, նախագահների, արտգործնախարարների  մակարդակով:

Լեոնիդ Կոժարան նշել է, որ Ուկրաինան աջակցում է ԵԱՀԿ ՄԽ-ի գործունեությունը, սակայն կարծում է, որ ՄԽ-ն կարող էր էլ ավելի ակտիվ լինել եւ այդ դեպքում գործունեությունն ավելի արդյունավետ կլիներ: «Կոնֆերանսից կամ հանդիպումից հետո ոչ մի հակամարտություն չի կարգավորվել: Գործնական աշխատանք է պետք», - նշել է Կոժարան:

Միաժամանակ նա ընդգծել է քաղաքացիական հասարակության ներկայացուցիչների հանդիպման կազմակերպման կարեւորությունը: Ըստ նրա` Ուկրաինան պատրաստ է իր տարածքը տրամադրել նման հանդիպում անցկացնելու համար:   

Բացի դրանից, Ուկրաինան աջակցում է հումանիտար աղետների  հետեւանքների մեղմացմանն ուղղված ցանկացած գործունեության: Իսկ ցանկացած խնդրի հաջորդում են նման հետեւանքներ, նկատել է նախարարը: