«Երեւան Ջուր» ընկերությունը հաղորդագրություն է տարածել՝ տեղեկացնելով, որ ջրաչափերը պետք է վերատեղադրվեն փողոցում:

Հաղորդագրությունում ասվում է.

«2000-ականների սկզբին Երեւանում սկսվեց ջրաչափերի զանգվածային տեղադրման ու բնակիչների հետ ջրամատակարարման եւ ջրահեռացման ծառայությունների պայմանագրերի կնքման գործընթացը, որի շնորհիվ հնարավոր դարձավ կարճ ժամանակամիջոցում արմատապես շտկել իրավիճակը ջրամատակարարման ասպարեզում: Սակայն ժամանակի եւ ֆինանսական միջոցների սղության պատճառով մի շարք խնդիրների լուծումը թողնվեց ապագային, այդ թվում մատակարարվող եւ վաճառվող ջրի ծավալների հստակ հաշվառումը մասնավոր տնատիրություններում:

Բանն այն է, որ գործող օրենսդրությամբ, մասնավորապես ՀՀ կառավարության 2004թ. հունվարի 22-ի թիվ 130 Ն որոշմամբ, ջրաչափերը պետք է տեղադրված լինեն բաժանորդի տարածքից դուրս, վերջինիս անհատական ջրագծի վրա, ջրամատակարար կազմակերպության եւ բաժանորդի իրավասությունների սահմանազատման, այսինքն՝ ընկերությանը պատկանող փողոցի ջրագծի եւ բաժանորդի անհատական ջրագծի հատման կետին հնարավորինս մոտ վայրում: Մինչդեռ մեզանում ջրաչափերը որպես կանոն տեղադրվել են շինությունների ներսում:

Առաջին հերթին խոսքն այն սպառողների մասին է, որոնք.

- նախկինում ունեցել են ապօրինի ջրագիծ, որը կառուցված է եղել առանց ջրամատակարար կազմակերպության կողմից տրված պարտադիր «Տեխնիկական պայմանի»: Նշված անձինք բաժանորդ են դարձել որպես փաստացի սպառող եւ տեղադրել են ջրաչափ՝ սպառածի դիմաց վճարելու պայմանով:

- ունեցել են «Տեխնիկական պայման», սակայն ջրաչափական սարքը տեղադրել են ոչ թե նրանում նշված վայրում, այլ կառույցի ներսում:

Դա հանգեցրել է նրան, որ, մասնավորապես.

- ընկերությանը պատկանող փողոցի ջրագծից մինչեւ բաժանորդի ջրաչափ հատվածից իրականացվում են ապօրինի միացումներ, որով կատարված ջրի ծախսը չի հաշվառվում,

- բաժանորդը չի շտապում վերանորոգել սեփական վթարված ջրագիծը, ինչը ջրի կորստի է բերում,

- առկա է վտանգ, որ ջրամատակարարման ընդհատումների դեպքում վթարված խողովակներից կարող է ներթափանցել անձրեւաջուր, գրունտային կամ կոյուղաջուր եւ վտանգել թաղամասի բնակիչների առողջությունը,

- կամայականորեն, առանց տեխնիկական հիմնավորման կառուցված ջրագծերի պատճառով ընկերությունը հաճախ դժվարություններ է ունենում բաժանորդների ջրամատակարարման ապահովման գործում,

- ընկերության մասնագետ-տեսուչները ստիպված են լինում ավելորդ անգամ անհանգստացնել բաժանորդներին՝ ջրաչափերի ցուցմունքները գրանցելու համար, ինչը խոչնդոտում է սպասարկման որակի բարձրացմանը:

Վերջին տարիներին Երեւան Ջուր ընկերությունը, ջրամատակարարման հետագա կանոնավորման եւ ջրի վաճառքի հաշվարկի հստակեցման նպատակով  իրականացվող աշխատանքների շրջանակներում, ձեռնամուխ է եղել նշված խնդրի քայլ առ քայլ լուծմանը:

Առաջին հերթին անհատական ջրագծի եւ ջրաչափի հետ կապված խնդիրներ ունեցող՝ վերը նշված երկու խմբերի բաժանորդները, ինչպես նաեւ ընկերության նոր բաժանորդները պարտադիր կարգով ջրաչափերը պետք է վերատեղադրեն շինություններից դուրս գտնվող հորերում:

Հաջորդաբար, ջրաչափերը սեփական տարածքից դուրս գտնվող հորերում պետք է վերատեղադրեն մասնավոր տնատիրություններում բնակվող մյուս բաժանորդները: Իր հերթին, Երեւան Ջուր ՓԲԸ, մասնավոր տնատիրություններով կառուցապատված փողոցներում փոխարինելով ջրագծերը, բաժանորդների ջրաչափերը վերատեղադրում է փողոցում:

Սա մի ծրագիր է, որը բխում է ողջ հանրության շահերից ու համապատասխանում գործող օրենսդրությանը, հետեւաբար պարտադիր է բոլոր շահագրգիռ կողմերի համար, եւ որը Երեւան Ջուր ՓԲԸ նախատեսում է ավարտել առաջիկա տարիներին»: