նախընտրելի դարձնել
«Բոքո հարամի» իսլամիստները նորից հարձակում են գործել Նիգերիայում: Դեմբա ավանում սպանվել է 44 մարդ, հայտնում է Reuters-ը: AFP-ն հայտնում է 35 սպանվածի եւ 14 վիրավորի մասին:
Միջադեպը տեղի է ունեցել օգոստոսի 19-ին, սակայն այդ մասին հայտնի է դարձել միայն օգոստոսի 23-ին` բնակավայրի մեկուսացվածության պատճառով: Զինվորական համազգեստ հագած գրոհայինները սպանել են մզկիթից դուրս եկող հավատացյալներին։ Իշխանությունները կարծում են, որ հարձակումը իսլամիստների վրեժն էր խաղաղ բնակիչներից` իրենց հետ չհամագործակցելու համար, հաղորդում է lenta.ru-ն:
Ավելի վաղ օգոստոսին «Բոքո հարամի» գրոհայինները նման գործողություն էին ձեռնարկել երկրի հյուսիս-արեւելքում գտնվող Կոնդուգա քաղաքում: Այնտեղ նույնպես սպանվել էր մզկիթում գտնվող 44 հավատացյալ, երբ գրոհայիններն իմացել էին քաղաքում ժողովրդական ինքնապաշտպանական ջոկատների ստեղծման մասին:
«Բոքո հարամ» խմբավորումը պայքարում է հիմնականում մահմեդականներով բնակեցված Նիգերիայի հյուսիսում շարիաթի օրենքներով պետություն ստեղծելու համար:
