նախընտրելի դարձնել
ՄԱԿ-ի Փախստականների գլխավոր հանձնակատարի հայաստանյան գրասենյակի հետ երկար տարիների արդյունավետ ու բազմաճյուղ փոխգործակցությունը կշարունակվի եւ դրական արդյունքներ կունենա նաեւ փախստականների եւ տեղահանված անձանց համար: Այս մասին, այսօր՝ սեպտեմբերի 24-ին, ՄԱԿ-ի Փախստականների գլխավոր հանձնակատարի գրասենյակի հայաստանյան նորանշանակ ներկայացուցիչ Քրիստոֆ Բիրվիրթիի հետ հանդիպման ժամանակ նշել է Հայաստանի փոխվարչապետ, տարածքային կառավարման նախարար Արմեն Գեւորգյանը:
Փոխվարչապետը ներկայացրել է ինչպես Ադրբեջանից բռնագաղթածների, այնպես էլ սիրիահայերի խնդիրները: Նա առավել կարեւոր է համարել նրանց բնակարանային ապահովվածության հարցը` ափսոսանքով նկատելով, որ մինչ օրս հնարավոր չի եղել ամբողջությամբ լուծել Ադրբեջանից մոտ երկու տասնամյակ առաջ բռնագաղթածների բնակարանային խնդիրը: Հայաստանի կառավարությունը փորձում է նաեւ հնարավորության սահմաններում պայմաններ ստեղծել սիրիահայերի կեցության համար:
Միաժամանակ նա նկատել է, որ ՓԳՀ հայաստանյան գրասենյակի հետ համագործակցաբար հաջողվել է թեեւ ոչ մեծ մասշտաբի, բայց արդյունավետ ծրագրեր իրականացնել` մասնավորապես սոցիալական տների կառուցման եւ շահագործման ծրագրերը: Նա առանձնացրել է նաեւ գրասենյակի հետ համագործակցությունը թրաֆիքինգի դեմ պայքարի, միգրացիայի ոլորտում տարբեր հետազոտությունների իրականացման, ինչպես նաեւ իրավական փաստաթղթերի մշակման աջակցության ոլորտներում:
Քրիստոֆ Բիրվիրթն իր հերթին պատրաստակամություն է հայտնել շարունակել արդյունավետ համագործակցությունը: Հայաստանի կառավարության համար նա կարեւոր համարեց փախստականների եւ տեղահանված անձանց համար անհրաժեշտ պայմանների ապահովումը` միաժամանակ պատրաստակամություն հայտնելով խնդրի վրա հրավիրել նաեւ միջազգային դոնոր կազմակերպությունների ուշադրությունը:
