Տարեկան 150 հազար դոլարից ավելի եկամուտ ունեցող ամերիկացիների երեխաները ծնողների կողմից ուժեղ ճնշման են ենթարկվում, ինչի պատճառով իրենց ոչ հարուստ տարեկիցներից կրկնակի հաճախ են տառապում հոգեկան շեղումներից, պնդում է Արիզոնայի համալսարանի գիտնական Սունյա Լուտան:

Ավելի վաղ ապացուցվել էր, որ աղքատ ընտանիքներում մեծացած երեխաները, հակված են դեպրեսիայի, ինչպես նաեւ ունեն սոցիալական եւ զգացմունքային բնույթի տարբեր խնդիրներ: Սակայն Լուտան իր ուսումնասիրության մեջ ցույց է տվել, որ հարստությունն էլ կարող է ազդել երեխաների հոգեկան ներաշխարհի վրա:

«Կրթությունը եւ փողը գուցե մի ժամանակ սթրեսից պաշտպանող միջոց են եղել, սակայն այժմ դա այդպես չէ: Ինչ-որ բան փոխվել է. փաստերը ցույց են տալիս, որ հարուստ երիտասարդներն ավելի խոցելի են դարձել, քան նախորդ սերնդի օրոք», - գրում է Լուտան Psychology Today ամսագրի հոդվածում:

Հոդվածի հեղինակը հարուստ դեռահասների վարքը համեմատել է  աղքատ դեռահասների վարքի հետ: Պարզվել է, որ առաջիններն իրենց տարեկիցներից ավելի շատ են  թմրանյութեր եւ ալկոհոլ  օգտագործում: Բացի դրանից, «ոսկի երիտասարդության» շրջանում  բավական տարածված է կողոպուտը, իսկ աղքատ ընտանիքների երեխաները այլ բնույթի հանցագործություններ են կատարել՝ հիմնականում կապված ինքնապաշտպանության հետ:  Ընդ որում՝ հարուստ դեռահասները կրկնակի  ավելի են տառապում ընկճախտով եւ հոգեկան այլ հիվանդություններով, քան աղքատները, հաղորդում է «ՌԻԱ Նովոստին»:

Հոդվածի հեղինակն այդ երեւույթի պատճառն է համարում այն, որ հարուստ եւ հաջողակ ծնողներն իրենց երեխաներից չափազանց մեծ ակնկալիքներ են ունենում, ինչպես եւ ուսուցիչները: