Փոլ Մաքքարթնին դիմել է Վլադիմիր Պուտինին՝ խնդրելով ազատել Greenpeace-ի ակտիվիստներին եւ նրանց հետ կալանավորված լրագրողներին: 

Հայտնի երաժշտի նամակը թվագրված է հոկտեմբերի 14-ին, սակայն  նրա կայքում հայտնվել է մեկ ամիս անց, այդ ժամանակահատվածում ռուսական իշխանությունները օրենքով պետք է պատասխանեն նամակներին եւ դիմումներին:

Մաքքարթնիի դիմումը ռուս նախագահին հարգալից եւ բարեկամական տոնով է գրված՝ թեեւ նախագահին դիմում է անունով:

Նամակում Մաքքարթնին Պուտինին հիշեցրել է 2003թ. մայիսի 24-ին Կարմիր հրապարակում իր համերգի մասին, որից մեկ օր առաջ Ռուսաստանի նախագահն ընդունել էր իրեն Կրեմլի իր նստավայրում եւ ուղեկցել Կրեմլում զբոսանքի ժամանակ:

«Ես իմ ռուս ընկերներից լսել եմ, որ բողոքողները որոշ շրջաններում նեկայացվում են որպես հակառուսներ, որ իբր նրանք կատարել են արեւմտյան կառավարությունների կամքը, եւ որ նրանք սպառնացել են այդ պլատֆորմում աշխատող մարդկանց անվտանգությանը», – ասված է նամակում:

«Գրում եմ, որպեսզի ձեզ վստահեցնեմ, որ իմ իմացած Greenpeace-ը, բնականաբար, Ռուսաստանի դեմ չի տրամադրված: Այդ կազմակերպությունը զայրացնում է բոլոր կառավարություններին:  Եվ  նրանք երբեք փող չեն ստանում աշխարհի ոչ մի կառավարությունից կամ կազմակերպությունից», – շարունակում է երաժիշտը, հաղորդում է BBC-ի ռուսական ծառայությունը:

«Վլադիմիր, - գրում է Մաքքարթնին, - տասնյակ երկրներում միլիոնավոր մարդիկ  երախտապարտ կլինեն, եթե դուք միջամտեք՝ այդ գործին վերջ դնելու համար»:

Վերջում երաժիշտը մեջբերում է կատարում իր հայտնի Back In The USSR երգից, որը գրվել էր 1968 թ.՝ White Album-ի համար:

«Ես այնքան երկար եմ բացակայել, որ ոչինչ չեմ ճանաչում: Տեր Աստված, ինչքան լավ է նորից տանը լինել»:

Ռուսաստանի նախագահի մամուլի քարտուղարը «ՌԻԱ Նովոստիին» ասել է, որ Կրեմլում չեն ստացել Փոլ Մաքքարթնիի նամակը: