նախընտրելի դարձնել
Վենեսուելայի խորհրդարանը երկրորդ ընթերցմամբ ընդունել է երկրի նախագահին արտակարգ լիազորություններ տրամադրելու մասին օրինագիծը, որով նախագահ Նիկոլաս Մադուրոն հնարավորություն է ստանում օրենսդրական գործունեություն ծավալել, հայտնում են լատինամերիկյան հեռուստաալիքները։
Օրինագծին կողմ են քվեարկել 165 պատգամավորներից 99-ը։
Մադուրոն բազմիցս հայտարարել էր, որ հատուկ լիազորություններն իրեն անհրաժեշտ են խանութներում բարձր գների, խարդախությունների եւ կոռուպցիայի դեմ պայքարելու համար: Ընդդիմությունն էլ պնդում էր, որ այդ օրենքն ընդունելով, իշխանությունները փորձում են թաքցնել տնտեսական խնդիրների իրական պատճառները եւ խախտում են իշխանության բաշխման սկզբունքը, հաղորդում է «ՌԻԱ Նովոստին»:
Վերջին շաբաթներին Վենեսուելայի նախագահը իր ելույթներում բազմիցս անդրադարձել է կոռուպցիայի դեմ պայքարի անհրաժեշտությանը: Մեկ շաբաթ առաջ նա հրահանգել էր առգրավել եւ ցածր գներով վաճառել մանրածախ առեւտրի ցանցերից մեկի էլեկտրական-կենցաղային ապրանքները: Բացի դրանից, նա հայտարարել էր խարդախության եւ բջջային հեռախոսների, մեքենաների եւ այլ կենցաղային իրերի վաճառքի բարձր գների դեմ պատերազմ սկսելու մասին:
