Կիեւի ոստիկանությունը ցրել է  Անկախության մայդանում բողոքող ցուցարարներին:  «Մի շարք միջադեպերի, բախումների պատճառով որոշվել է մարդկանց ցրել Անկախության մայդանից»,-  պարզաբանել են ոստիկանությունից:

Կիեւում «եվրոմայդանը» ցրելու ժամանակ մարդիկ են տուժել, հայտնում է «5-րդ ալիքը»: «Կան տուժածներ: Գրեթե բոլոր տուժածների գլուխները կոտրված են», - դեպքի վայրից հայտնել է «5-րդ ալիքի» լրագրողը:

Նարնջագույն հեղափոխության  մասնակիցների կոալիցիայի մամուլի ծառայությունը հայտնել է, որ ցույցը ցրելու համար հազարավոր «բերկուտցիներ» էին եկել, մայդանն ամբողջությամբ վահաններով էին ցանկապատել, հաղորդում է «Ինտերֆաքս-Ուկրաինան»:

«Մարդկանց պարզապես սպանում էին մահակներով: Կիրառել են արցունքաբեր գազ: Մայդանում լսվել են պայթյուններ: Բազմաթիվ մարդիկ վիրավորվել են: Մարդկանց աղբի նման նետում էին Մայդանից դուրս», - ասվում է հաղորդագրության մեջ: Ըստ կոալիցիայի` ակտիվիստների մի մասին կալանավորել են,  իսկ Մայդանում անջատել են բջջային կապը: