նախընտրելի դարձնելՄայիսի 18-ին՝ ժամը 15.30-16.10-ի սահմաններում, Տավուշի մարզի Ճամբարակ-Դրախտիկ հանրապետական նշանակության ավտոճանապարհի 5-րդ կմ-ում տեղի է ունեցել 150-200 մետր բարձրությամբ սարի ամբողջական փլուզում:
Մեծ ժայռաբեկորները, որոնց ծավալը 250-280 խմ է, երկկողմանի փակել են ճանապարհը: Այս պահին եւս ճանապարհին շարունակվում են քարեր եւ ժայռաբեկորներ թափվել:
Դեպքի վայրում աշխատանքներ են կատարում Դիլիջանի «Հաղարծին» ՓԲԸ-ի ճանապարհաշինարարները:
Տեղի ունեցած փլուզման հետեւանքով տուժածներ չկան:
ՀՀ տրանսպորտի եւ կապի նախարարությունը վարորդներին խորհուրդ է տալիս չօգտվել նշված ճանապարհահատվածից:
ԱԻՆ-ից էլ հայտնում են, թե դեպքի վայր են մեկնել ՀՆՓԱԻԿ ինժեներասակրավորական խումբը` պայթեցնողներով, ՄՃԿԿ օպերատիվ խումբը եւ «Դիլիջան ՃՇՇ»-ի աշխատակիցները:
Քարաթափման վտանգը վերացնելու, ճանապարհահատվածը բացելու, այն երթեւեկության համար անվտանգ դարձնելու, պայթեցումներով ուղեկցվող բարդագույն աշխատանքները ղեկավարելու համար դեպքի վայր է մեկնել ՀՀ ԱԻ նախարար Արմեն Երիցյանը:
Ուղիղ հեռուստակապ է հաստատված սահմանազատված ճանապարհահատվածի եւ ՀՀ ԱԻՆ ճգնաժամային կառավարման կենտրոնի միջեւ:
Կատարվող աշխատանքները գտնվում են ՀՀ վարչապետ Հ. Աբրահամյանի ուշադրության կենտրոնում:
