Երեւանի քաղաքապետարանի կայքը կատարելագործելու եւ տեղեկատվությամբ հարստացնելու մասին նամակով քաղաքապետին է դիմել Երեւանի ավագանու «Բարեւ Երեւան» խմբակցության անդամ Անահիտ Բախշյանը:
Նամակում մասնավորապես, ասվում է.
«Ավագանու անդամներս մեր գործունեության ընթացքում կարիք ենք ունենում Երեւանի քաղաքապետարանի ենթակայության պետական տարբեր կառույցների վերաբերյալ շատ բազմաբովանդակ տեղեկատվություն, որոնց մասին ստիպված ենք Ձեզ ուղղել բազմաթիվ նամակներ: Մասնավորապես Երեւանի ենթակայության դպրոցների եւ մանկապարտեզների մասին կայքում եղած տեղեկությունները չափազանց սահմանափակ են,այն կարող է ավելի լիարժեք գործել այնպես, որ դպրոցի կամ մանկապարտեզի համարը սեղմելով՝ էջը նրա մասին բերի բոլոր այն տեղեկությունները, որոնք քաղաքապետարանը ստանում է դպրոցներից՝ լիցենզավորման փաստաթղթից սկսած՝ մինչեւ պետական ֆինանսավորման եւ Կառավարման խորհուրդների կողմից հաստատված նախահաշիվները:
Սա նաեւ կվկայի, որ քաղաքապետարանն աշխատում է բաց ու թափանցիկ եւ բոլորիս կազատի ավելորդ նամակագրությունից, որն իսկապես շատ ժամանակ է խլում թե՛ քաղաքապետարանի աշխատակիցներից, ովքեր չեն թաքցնում իրենց իրավացի դժգոհությունն այս առթիվ, թե՛ ավագանու անդամներից: Կշահի մեր համագործակցության ժամանակը:





























