Դուք կարծում եք աշխատավարձերի բարձրացման այս փուլում նախագահ Սերժ Սարգսյանի կամ կառավարության համար ցանկալի՞ էր  էլեկտրաէներգիայի սակագնի բարձրացման հրաման տալը։ Այս մասին հուլիսի 5-ի մամուլի ասուլիսում հայտարարել է ՀՀԿ  խմբակցության ղեկավար Վահրամ Բաղդասարյանը։

Ըստ նրա` դրան առաջին հերթին դեմ էր Հանրային ծառայությունները կարգավորող հանձնաժողովը: «Ի՞նչ եք կարծում, կգտնվի՞ արդյոք ՀՀ մի քաղաքացի, որը կցանկանար էլեկտրաէներգիայի սակագնի թանկացում:  Պատահական չէ, որ հանձնաժողովի նիստից առաջ երկար քննարկում տեղի ունեցավ նաեւ կառավարութունում, որտեղ ելք էին փնտրում այս վիճակից: Եվ բնականաբար, քանի որ այլ տարբերակ չկար, եւ քանի որ համոզվեցին, որ ստեղծված պայմաններում այլընտրանք չկա,  հենց ՀՀԿ-ի առաջարկով ստեղծվեց համապատասխան հանձնաժողով` «Հայաստանի էլեկտրական ցանցերի» գործունեությունը ստուգելու նպատակով, - նշել է Վահրամ Բաղդասարյանը: Նա ընդգծել է, որ բոլոր տարբերակներն ուսումնասիրելուց հետո,  եզրակացրել են՝ թանկացումը պետք է կատարվի տվյալ փուլում:

Հայաստանում էլեկտրաէներգիայի թանկացումը նախատեսված է օգոստոսի 1-ից։ Այն բնակչիչների համար կկազմի 10%, ձեռնարկությունների համար՝  մինչեւ 15%։

Կառավարությունը 105 հազար անապահով ընտանիքների համար կփոխհատուցի թանկացումը. 1000 դրամով  կավելանան ընտանեկան նպաստները, սոցիալական նպաստները եւ կիսամյակային անհետաձգելի օգնությունը։