Վարչապետ Հովիկ Աբրահամյանն ընդունել է «Մայքրոսոֆթ» ընկերության Կենտրոնական եւ Արեւելյան Եվրոպայի նոր շուկաների գլխավոր մենեջեր Փիլար Թորեսին: Ողջունելով հյուրին՝ վարչապետը նշել է, որ տեղեկատվական տեխնոլոգիաների ոլորտը Հայաստանում ամենաարագ զարգացող ճյուղերից մեկն է: «Այն զարգացման մեծ ներուժ ունի եւ համարվում է ՀՀ կառավարության ծրագրի առանցքային ուղղություններից մեկը»,- նշել է Հովիկ Աբրահամյանը:

Վարչապետը վստահեցրել է, որ ՀՀ կառավարությունը շահագրգռված է «Մայքրոսոֆթ»-ի հետ համագործակցությունը շարունակելու եւ ընդլայնելու գործում: Հաշվի առնելով երկկողմ համագործակցության հաջող փորձը՝ Հովիկ Աբրահամյանն առաջարկել է քննարկել նոր ուղղություններով երկարաժամկետ համագործակցության եւ Հայաստանում ՏՏ ոլորտի զարգացմանն ուղղված նոր հեռանկարային ծրագրերի իրականացման հնարավորությունները: Մասնավորապես, կառավարության ղեկավարն անդրադարձել է «Մայքրոսոֆթ» ինովացիոն կենտրոնի հենքի վրա «Մայքրոսոֆթ Վենչուրս» աքսելերատոր ստեղծելու եւ մոբայլ լուծումների/մշակումների կենտրոն հիմնելու հնարավորություններին:

Փիլար Թորեսը ողջունել է ՀՀ կառավարության նախաձեռնությունն՝ ուղղված ՏՏ բնագավառի զարգացման ծրագրերի իրականացմանը եւ վստահություն հայտնել երկկողմ համագործակցության ընդլայնման հարցում: Տիկին Թորեսն իր հերթին կարեւորել է փոխգործակցությունը մտավոր սեփականության, քաղաքացիների իրավունքների պաշտպանության եւ կիբեռհանցագործությունների դեմ պայքարում:

Այնուհետեւ զրուցակիցները քննարկել են ՀՀ կառավարության եւ «Մայքրոսոֆթ» ընկերության միջեւ փոխըմբռնման նոր հուշագրի ստորագրմանն առնչվող հարցեր: